Vinnudagur í Bláfjöllum, sunnudaginn 6. maí.

Auglýsum eftir sjálfboðaliðum til að taka þátt í vinnudegi í Bláfjöllum sunnudaginn 6. maí kl. 10:00.

Ætlum að sjálfsögðu ekki að vera allan daginn, enda eftir því sem fleiri taka þátt, því fljótari erum við. Sendið okkur línu á netfangið ullarpostur@gmail.com eða skilaboð á Facebook ef þið sjáið ykkur fært að mæta.

Verkefni dagsins eru:
* Bræðum geymsluvax undir leiguskíði.
* Förum yfir ástand á leiguskíðum, skóm og stöfum. Talning og staðan tekin fyrir næsta vetur.
* Tiltekt í skálanum.
* Tiltekt í smurgámi.
* Ýmislegt fleira sem til fellur.

Ekki spurning að taka þátt í smá „dugnaði“ með okkur, eins og Norðmenn kalla það, enda vinna margar hendur létt verk.

Sjáumst hress og kát.
Stjórnin

Skíðamót Íslands í Bláfjöllum og Skálafelli 5. – 8. apríl 2018

Á morgun hefst Skíðamót Íslands en í ár eru það Skíðagöngufélagið Ullur og Breiðablik sem halda mótið saman. Mótið fer fram í Bláfjöllum og Skálafelli, en gönguhlutinn fer eingöngu fram í Bláfjöllum.

 

Dagskrá gönguhlutans er þessi:
Fimmtudagur 5. apríl kl 14:00: Sprettganga
Föstudagur 6. apríl kl 11:00: Hefðbundið, einstaklingsstart
Laugardagur 7. apríl kl 11:00: Frjáls aðferð, hópstart
Sunnudagur 8. apríl kl 11:00: Liðasprettur

Fyrir þá sem eru áhugasamir um framgang mála á mótinu bendum við á facebook hópinn, SMI 2018 Bláfjöllum og Skálafelli, en þeim hópi er ætlað að vera vettvangur fyrir þátttakendur, skipulagshaldara og aðra velunnara skíðaíþróttarinnar vegna Skíðamóts Íslands dagana 5. til 8. apríl 2018 í Bláfjöllum og Skálafelli.

Athugið að á meðan á móti stendur er skálinn okkar lokaður. Við biðjum fólk einnig að sýna tillitssemi við brautir á þessum tíma.

Úrslit úr Bláfjallagöngu

Til þátttakenda í Bláfjallagöngunni í dag.
Eins og flest ykkar vita, þá voru nokkrir þátttakendur með ranglega skráðan tíma eftir gönguna vegna misskilnings í tímatöku við ræsingu. Teljum við að búið sé að leiðrétta úrslitin. Athugasemdir varðandi tíma berist á timataka@timataka.net eða ullarpostur@gmail.com
Við biðjumst velvirðingar á þessum töfum á réttum úrslitum en þökkum fyrir frábæran dag og við vonumst til að sjá ykkur í Bláfjallagöngunni að ári.
Með kveðju Mótanefnd

Hér má sjá úrslit dagsins: https://timataka.net/blafjallagangan2018/

Bláfjallagöngu og Strompaskauti frestað til 24. mars

Að vandlega athuguðu máli hefur mótanefnd ákveðið að fresta Bláfjallagöngunni og Strompaskauti um viku!  Vindaspá fyrir morgundaginn er mjög svipuð og er núna, og þótt það segi 5-6 m/s við Bláfjallaskála núna, þá gerðum við athugun úti í braut og þar er minnst 10-12 m/s við skálann okkar og fer upp í 17 m/s úti í braut.   Við viljum ekki senda fólk út í svoleiðis.

Vonandi stenst langtímaspáin um að það kólni ögn í lok vikunnar og verði gott logn næstu helgi.
Mótsstjórn

Bláfjallagangan og Stromaskaut 17. og 18. mars

Enn er hægt að skrá sig í Bláfjallagönguna sem fer fram núna á laugardaginn 17. mars og Strompaskautið sem fer fram á sunnudaginn 18. mars, sjá nánar dagskrá og aðrar upplýsingar á mynd hér að neðan.

Það stefnir í flotta göngu á laugardaginn. Það er mjög góð skráning komin nú þegar og allt að gerast. Við verðum með tónlist á tveimur stöðum í brautinni. Drónar munu fljúga um svæðið og mynda ykkur í bak og fyrir. Búið að ráða amk tvo professional ljósmyndara líka. Þetta verður geðveikt stuð.

Það verða flott útdráttarverðlaun í Bláfjallagöngunni á laugardaginn, m.a. nokkur 10.000 kr. gjafabréf frá Everest, nokkur 7000 kr. gjafabréf frá Jómfrúnni, skíði frá Íslensku Ölpunum, borvélar og fleiri tæki frá Byko, ullarvörur frá Ullarkistunni, vörur frá Craft Sport, gjafakort frá Ísleifi heppna fyrir einhverja heppna keppendur og margt fleira.

Í kaffisamsætinu sem verður í Áskirkju verða meðal annars á boðstólum 150 snúðar frá Brauð & Co og fullt af öðru heimabökuðu gommelsi. Þetta getur ekki klikkað.

Við hlökkum mikið til og vonum að þið gerið það líka. Gerum laugardaginn eftirminnilegan saman.

Kveðja, mótsstjórn.

Athugið breyttar dagsetningar, göngunarnar fara fram 17. og 18. mars.

Ullungar fjölmennir í Strandagöngu

Í dag fór fram 24. Strandagangan í Selárdal á vegum Skíðafélags Strandamanna. Ullur átti fjölda þátttakenda að þessu sinni, stóran hóp á öllum aldri. Okkar yngstu keppendur stóðu sig með sóma og gengu 1 og 5 km við fínar aðstæður, þó lítilsháttar vindur og kuldi hafi bitið í kinnar. Eldri Ullungar gengu 10 og 20 km og voru félaginu til sóma enda margir hverjir á verðlaunapalli. Þar með talið átti Ullur fyrsta karl og konu í 20 km göngu. Úrslit má nálgast hér.

Mótið var frábært í alla staði og óskum við Strandamönnum til hamingju með flotta aðstöðu í Selárdal. Að hætti Strandamanna var boðið til kökuhlaðborðs og verðlaunaafhendingar í félagsheimilinu að göngu lokinni.

 

Nýjar æfingalotur fyrir byrjendur og lengra komna og skautanámskeið

Á laugardaginn 10. mars hefjast  3 ný námskeið hjá Ulli.  Þetta eru: 6 skipta námskeið fyrir byrjendur, 4 skipta framahaldsnámskeið og svo 4 skipta skautanámskeið. Nánari lýsing á námskeiðunum fylgir hér neðar í póstinum en hægt er að skrá sig námskeiðin á verslun.ullur.is.

Til að vera þátttakandi á þessum námskeiðum Ullar þarf að vera skráður í félagið.
Nánari upplýsingar um hvernig hægt er að skrá sig í félagið má finna hér.

Athugið, einungis er hægt að fá leigð skíði hjá félaginu ef æfingin fer fram í Bláfjöllum.
Verð á skíðaleigu með námskeiði er 2.000 kr. skiptið (fullt verð 3.000 kr. )

Vakin er athygli á því að eins og á öðrum skíðasvæðum þarf að kaupa skíðakort sem gildir í brautirnar í Bláfjöllum en það er ekki innifalið í námskeiðum sem haldin eru á svæðinu.

Fylgist með á Facebook síðu Ullar varðandi breytingar vegna veðurs.
Smelltu hér til að skoða staðsetningu Ullarskálans í Bláfjöllum, þar sem námskeið og æfingarnar fara fram.

Byrjendanámskeið, 6 skipti: Námskeiðið er ætlað byrjendum. Farið verður í alla helstu þætti skíðagöngunnar eins og skíðatækni, klæðnað, smurningu og fleira.
Verð: 12.000.- kr.

Kennslan fer fram á eftirfarandi dögum:
Laugardaginn 10.3 kl. 11:00
Sunnudaginn 11.3 kl. 11:00
Miðvikudaginn 14.3 kl 18:00
Fimmtudaginn 15:3 kl. 18:00
Sunnudaginn 18.3 kl. 13:30
Miðvikudaginn 21.3 kl. 18:00

Framhaldsnámskeið, 4 skipti:  Námskeiðið er ætlað þeim sem hafa verið áður á námskeiðum hjá Ulli.
Verð: 8.000.- kr.

Kennslan fer fram á eftirfarandi dögum:
Laugardaginn 10.3 kl. 12:30
Sunnudaginn 11.3 kl. 12:30
Miðvikudaginn 14.3 kl 19:30
Miðvikudaginn 21.3 kl. 19:30

Skautanámskeið, 4 skipti: Athugið, ekki er hægt að nota skinnskíði eða riffluð skíði. Það er þó hægt að nota venjuleg smurningsskíði þó best sé að vera á skautaskíðum, skauta- eða kombi skóm og 10 cm hærri stafi en í hefðundinni göngu.
Verð: 8.000.- kr.

Kennslan fer fram á eftirfarandi dögum:
Laugardaginn 10.3 kl. 10:30 (athugið breyttan tíma frá áður auglýstum tíma)
Sunnudaginn 11.3 kl. 10:30 (athugið breyttan tíma frá áður auglýstum tíma)
Þriðjudaginn 13.3 kl 18:00
Fimmtudaginn 15.3 kl. 18:00