Hjólaskíðanámskeið fyrir börn og unglinga

skid_Kristrun-696x464

Kristún (nr. 1) í keppi á Skíðamóti Íslands 2019, ljósmynd Hólmfríður Svavarsdóttir

Líkt og síðasta sumar stendur Kristrún Guðnadóttir fyrir hjólaskíðanámskeiði fyrir börn og unglinga. Kristrúnu þarf ekki að kynna fyrir Ullungum. Hún hefur undanfarinn vetur staðið sig vel í keppnum um allan heim og ber þar helst að nefna þátttöku hennar á heimsmeistaramótinu á liðnum vetri.

Námskeiðið verður haldið dagana 24. júní til 27. júní og er fyrir krakka á aldrinum 7-16 ára. Æfingar fara fram við Víkingsheimilið í Fossvogi.

Námskeiðið er tilvalið fyrir krakka sem vilja læra betur á hjólaskíðin, hlaupa, hoppa og með því byggja upp færni, þol, styrk og snerpu fyrir næsta vetur. Það er ennig er hægt að vera á línuskautum fyrir þá sem ekki eiga hjólaskíði. Dagskrá er sem hér segir:

Mánudagur 24. júni

Kl. 10.00 Æfing 1, hjólaskíði – Nokkrir hringi á skíðum og leikir

Kl. 11.30 – 12.00 Hádegishlé

Kl. 12.00 – 14.00 Æfing 2, hlaup með hoppum og sprettum

Þriðjudagur 25. júní

Kl 10.00 Æfing 1, hjólaskíði – Leikir og tækniæfingar

Kl. 11.30 -12.00 Hádegishlé

Kl. 12.00 -14.00 Æfing 2, hjólaskíði – Braut með hindrunum og sprettir

Miðvikudagur 26. júní

Kl.10.00-12.00 Æfing 1, hjólaskíði – Tækni og ganga stærri hring

12.00 Sund eftir æfingu

Fimmtudagur 27. júní

11.00 Fjallganga með stafi

Verð: 15. 000 kr, systkini 20.000 (samtals)

Skráningar og fyrirspurnir skal senda á kristrungud@gmail.com

 

 

 

Samæfing í Reykjavík 15. – 17. júní 2019 fyrir 12 ára og eldri

SKÍ boðar til samæfingu skíðagöngufólks 12 ára og eldri (fædd 2007 og fyrr, 13 ára og eldri á næsta keppnistímabili 2019-2020) 15. – 17. júní í Reykjavík. Gist verður í Bláfjöllum í skíðaskála ÍR og Víkings en æfingarnar munu fara að mestu fram í Bláfjöllum en einhver hluti í Reykjavík. Kostnaður við hvern þátttakanda er 15.000 kr.

Dagskrána í heild ásamt upplýsingum um skráningu o.fl. má sjá hér: Samæfing í Reykjavík

Nánari upplýsingar gefur Jón Viðar Þorvaldsson, framkvæmdastjóri SKÍ á netfangið ski@ski.is eða í síma 660-4752.

Athugið, þeir Ullungar sem vilja taka þátt í samæfingunni þurfa að senda skráningu á netfangið ullarpostur@gmail.com í síðasta lagi kl 18:00 fimmtudaginn 13. júní. Þátttakendur sjá sjálfir um að millifæra þátttökugjaldið á reikning SKÍ.

Að loknum aðalfundi – Hugrún hættir

Aðalfundur Skíðagöngufélagsins Ulls var haldinn í húsakynnum ÍSÍ í Laugardal miðvikudaginn 15. maí 2019.

Mæting á aðalfundinn að þessu sinni var óvenju góð og til marks um að félagið er að stækka, áhuginn að aukast og starfið að eflast, eins og skýrsla stjórnar ber vitni um.

Ánægjulegt var að sjá að framkvæmdastjóri skíðasvæðanna og forstöðumaður Bláfjalla voru viðstaddir fundinn en nokkur umræða fór fram um framtíð Bláfjalla, sporlagningu og annað sem viðkemur aðstöðu í Bláfjöllum.

Nokkrar breytingar urðu á stjórn félagsins. Þar ber fyrst að nefna að Hugrún Hannesdóttir, sem hefur verið formaður undanfarin 2 ár og í stjórn frá árinu 2011, lætur af formennsku. Það er mikil eftirsjá í Hugrúnu enda hefur hún stýrt félaginu af miklum myndarskap. Kunnum við henni bestu þakkir fyrir frábært samstarf undanfarin ár.

Nýr formaður, Ingólfur Magnússon frá Sigufirði, hefur tekið við af Hugrúnu. Ingólfur hefur verið duglegur í innra starfi Ulls undanfarin ár og aðstoðað reglulega við mótahald, námskeið og önnur tilfallandi verkefni.

Aðrar breytingar á stjórn eru þær að Axel Pétur Ásgeirsson og Stefán Pálsson hætta í stjórn og inn koma Baldur Helgi Ingavarsson og Halla Haraldsdóttir í þeirra stað.

IMG_0366

Hugrúnu var þakkað fyrir vel unnin störf með glaðningi frá félaginu

IMG_0381

Ný stjórn, frá vinstri: Málfríður, Magnús, Ari, Ingólfur formaður, Ólafur, Baldur og Halla

IMG_0386

Fráfarandi formaður, Hugrún Hannesdóttir og nýr formaður, Ingólfur Magnússon

Andrésar Andarleikarnir 2019

Dagana 24.-27. apríl fóru Andrésar andarleikarnir fram í 44. skiptið á Akureyri. Að þessu sinni sendi Ullur 20 keppendur á aldrinum 5-15 ára auk þeirra Sigrúnar og Endre þjálfara. Aldrei hefur jafn stór hópur farið frá Ulli á Andrés eins og í ár. Sannarlega gleðilegt og sýnir að barna- og unglingastarfið er hægt og rólega að byggjast upp.

Leikarnir voru frábæri í alla staði eins og venjulega þrátt fyrir erfiðar aðstæður. Snjólítið var í Hlíðarfjalli við upphaf leikanna og minkaði hann hratt í blíðskaparveðri sem einkendi fyrsta daginn sérstaklega og dagana á eftir. Skíðafélag Akureyrar vann frábært starf við að halda brautum í horfi og gera upplifuna krakkanna sem ánægjulegasta.

Árangur krakkanna var frábær í alla staði og voru þau félaginu til sóma innan sem utanbrautar. Úrslit má nálgast hér. Upp úr krafsinu hafði Ullur nokkur gull, silfur og brons en umfram allt sæla og ánægða krakka.

Skíðagöngufélagið Ullur þakkar Skíðafélagi Akureyrar fyrir frábæra Andrésar andarleika.

This slideshow requires JavaScript.

Forpöntun á Madhus skíðum

Nú er hægt að forpanta Madshus skíði hjá Bobba í Craftsport á Ísafirði en pantanir þurfa að berast fyrir 15. apríl á netfangið bobbi@craft.is. Eins og venjulega þá þarf hann hæð, skóstærð og þyngd þar sem það á við. Úrval skíða og verð má sjá hér.

Stök byrjendanámskeið 6. apríl 2019

Við ætlum að bjóða upp á stök byrjendanámskeið laugardaginn 6. apríl.

Fyrra námskeiðið byrjar kl. 10:00 en það seinna kl. 12:00.

Námskeiðin taka um eina klukkustund og er námskeiðsgjald kr. 3.000,-
Leiga á skíðagöngubúnaði er kr. 2.000,- fyrir þátttakendur á námskeiðum Ullar.

Lágmarksfjöld til að námskeið verði haldið er 6 manns.
Ef mikil eftirspurn verður er möguleiki á að bætt verði við námskeiði.

Á laugardaginn er gert ráð fyrir hægum austlægun eða norðaustlægum vindi , hitastigi frá frostmarki í -4° og bjartviðri. Gæti orðið einn af betri skíðadögum vetrarins.

Skráning fer fram á verslun.ullur.is

Stromaskautinu frestað

Vegna veðurs er búið að blása Strompaskautið af í dag. Núna eru 10-11 m/sek, snjókomma og þoka. Það bætir svo í á meðan mótið hefði verið. Óvíst hvort og/eða hvenær við reynum að hafa það en það verður þá auglýst síðar.