Almennar upplýsingar til keppenda í Bláfjallagöngunni

English below
Kæru keppendur!
Metþátttaka er í Bláfjallagöngunni í ár og við biðjum ykkur að lesa vel yfir þennan póst.
Hér má sjá hvar flagan er fest og númerið.
Dagskrá
Föstudagur:
16:00-18:00 Afhending skráningargagna í Ferða- og útivistabúðinni Everest í Skeifunni 6, 108 Reykjavík (sjá staðsetningu hér)
Við viljum hvetja alla sem hafa tök á, að koma  í Everest til að létta á afhendingu gagna á mótsdag.
 
Laugardagur:
Gefið ykkur góðan tíma fyrir start. Það verða örugglega rúmlega 320 bílar á bílastæðinu. Verum góð og hjálpum hvert öðru.
 
07:30 Afhending keppnisgagna hefst
08:30 Afhending keppnisgagna lýkur fyrir 40 km
09:00 Ræsing fyrir 40 km (Tímatakmörk fyrir 40 km er að keppandi þarf að ná 20 km á 2:45 mín)
09:30 Afhending keppnisgagna fyrir 1 km, 5 km, 10 km og 20 km 
10:00 Ræsing fyrir keppendur í 1 km, 5 km, 10 km og 20 km
 
Brautin (sjá kort hér)
Marksvæðið verður lokað af þar til ræst verður út til að halda sporinu hreinu.
Hita má upp í brautinni, bara ekki á mark- og startsvæðinu, þar er viðkvæmur tímatökubúnaður sem gæti truflast.
 
Brautin er 20 km hringur
Stærsti hringurinn verður 20 km og fara keppendur í 20 km einn heilan stóran hring og keppendur í 40 km tvo hringi. 5 km brautin er með tveimur útgönguleiðum út úr 20 km hringnum og 10 km brautin er með einni útgönguleið úr úr 20 km hringnum, það er efst í brekkunni við Stórahól. Brautarverðir vísa leiðina fyrir 1 km. Brautirnar er teiknaðar og merktar með útgönguleiðum og drykkjarstöðvum á korti sem má sjá hér. Að auki verða brautarverðir og merkingar út í braut. 
 
Drykkjarstöðvar eru tvær
Sú fyrri er eftir 7,5 km við enda brekkunnar við Stórahól.
Sú seinni er við marksvæðið fyrir þá sem fara 40 km. 
 
Verðlaunaafhendingar og kaffisamsæti
Verðlaunaafhending fyrir hvern flokk í Bláfjöllum um leið og keppendur eru komnir í mark. 
Þeir fyrstu í karla- og kvennaflokki í 20 km og 40 km fá svo afhenta bikara í kaffisamsætinu kl. 14:00
Allir fá þátttökuverðlaun þegar þeir koma í mark.
Kaffisamsætið er í Valsheimilinu á Hlíðarenda og byrjar kl. 14:00 og er til 16:00
Úrdráttarverðlaun verða afhent samhliða kaffisamsætinu.
Reykjavíkurmeistarar verða ekki krýndir að þessu sinni samhliða Bláfjallagöngunni. Ýmis tæknilega atriði komu upp. Það verður auglýst sérstaklega síðar.
 
Parakeppni
Enn er hægt að skrá sig í parakeppnina í 20 km og 40km með því að smella hér. Til að finna félaga er hægt að skoða hverjir eru skráðir í gönguna.
 
Við sjáumst á morgun í Bláfjöllum!
Skíðagöngufélagið Ullur
 
English short version
Collect bib and chip in Everest today between 4-6PM or in the Ullur hut from 7:30-9:30AM tomorrow.
Be early tomorrow, the car park will be quite full. 
40 km start at 9:00AM and others start at 10:00AM.
The start and end zones will be closed until groups are started.
A map of the course with drinking stations can be seen here.
Cake buffet is from 2-4 PM in Valsheimili in Reykjavík
 
We are looking forward to seeing you in Bláfjöll tomorrow !
Ullur

Úrslit úr hjólaskíðamóti 21. október

Hið árlega hjólaskíðamót Ullar fór fram sunnudaginn 21. október í alls konar veðri en þátttakendur létu það ekki á sig fá og þutu um Fossvogsdalinn eins og enginn væri morgundagurinn.

Í ár mættu 13 þátttakendur til leiks á öllum aldri. Í fullorðinsflokki, 17 ára og eldri, voru sigurvegarar þau Gunnlaugur Jónasson, Ulli og Auður Ebenezersdóttir, líka úr Ulli. Í flokki unglinga sigraði Ægir Valbjörnsson, SKA. Það var Ferða- og útivistaverslunin Everest og Ísleifur heppni sem gáfu glæsileg verðlaun fyrir fyrstu þrjú sæti í kvenna-, karla- og unglingaflokki.

Nánari úrslit má sjá hér.

Úrslit og myndir frá hjólaskíðamótinu á sunnudag

Hjólaskíðamót Ullar fór fram á sunnudaginn í stilltu veðri í Fossvoginum en þar var nokkuð blautt eftir rigningar fyrr um daginn. Alls mættu 17 þátttakendur á öllum aldri, sem fóru ýmist 10 km, 5km, 2km, 1km eða í þrautabraut.

Í fullorðinsflokki, 17 ára og eldri, voru sigurvegarar þau Bryndís Ernstsdóttir, Ulli og Dagur Benediksson, SFÍ. Það var ferða- og útvistaverslunin Everest sem gaf glæsileg verðlaun fyrir fyrstu þrjú sæti í kvenna og karla flokki.

Nánari úrslit má sjá hér.

Myndir má finna hér en einnig má sjá fleiri myndir frá keppninni á mbl.is.

 

Hjólaskíðamót sunnudaginn 8. október

Hið árlega hjólaskíðamót Ullar verður haldið sunnudaginn 8. október. Mótið, sem er jafnframt fyrsti viðburður félagsins á nýjum skíðavetri, fer fram í Fossvogsdal en mark og start er í nágrenni Víkings og er merkt inn á kortið hér fyrir neðan. Ræst verður hjá yngri flokkum kl 10 og hjá 12 ára og eldri kl 10:30.

Dagskrá og flokkar eru eftirfarandi:

Ræsing kl. 10:00
11 ára og yngri eru á línuskautum
9 ára og yngri – fara 1 km (út frá marki eftir stígnum og til baka  í mark)
10-11 ára – fara 2 km (út frá marki eftir stígnum og til baka  í mark)

Þrautabraut fyrir þá yngstu við rásmark

Ræsing kl 10:30+  (eða um leið og allir eru komnir í mark og tímataka er klár)
12-16 ára stúlkur og piltar – Hjólaskíði, hefðbundin aðferð 5 km
12-16 ára stúlkur og piltar – Línuskautar, frjáls aðferð með stafi 5 km
17 ára og eldri konur og karlar – Hjólaskíði, hefðbundin aðferð 10 km

Þátttökugjald fyrir 12 ára og eldri er 1000 kr., 500kr fyrir yngri en 12 ára, ókeypis í þrautabraut. Hægt er að skrá sig hér, en einnig má skrá sig á staðnum. Æskilegt er að sem flestir skrái sig fyrir fram

Þátttökugjald greiðist á staðnum (ekki tekið við kortum). Nánari upplýsingar veita Einar Óla í síma 696 3699 og Málfríður í síma 894 6337.

Kort af 5km hring má sjá hér fyrir neðan (smella á mynd til að sjá stærri). Þar má einni sjá hvar startið er.

 

 

Íslandsgöngu 2017 lokið 

Íslandsgöngunni 2017 lauk að venju með Fossavatnsgöngunni á Ísafirði og var hún fjölmennari og glæsilegri en nokkru sinni fyrr. En þrátt fyrir það, metþátttöku í Bláfjallagöngunni og mjög góða þátttöku í Strandagöngunni varð heildarfjöldi þeirra sem fengu Íslandsgöngustig lítið eitt minni en í fyrra eða 257 á móti 263. Ástæðan er augljóslega sú að veður og snjóleysi fóru illa með göngur á Norðurlandi. Þátttakendur í Hermannsgöngunni voru rúmlega þriðjungi færri en í fyrra og Fjarðargangan og Orkugangan féllu niður.

Upplýsingar um Íslandsgönguna má finna undir „Æfingar og keppni – Íslandsgangan“ í svörtu línunni hér fyrir ofan eða með krækjunni „Íslandsgangan“ í dálkinum hér til hægri. Fara má beint í stgatöfluna 2017 með því að smella hér.

Strompaskautið, úrslit og myndir

Strompaskautið var haldið í fyrsta skipti í Bláfjöllum sunnudaginn 19. mars 2017 þar sem keppt var með frjálsri aðferð í lengri vegalengdum. Alls tóku 24 kappar þátt í hinum ýmsu vegalengdum.

Flokkar og vegalengdir voru eftirfarandi:
1 km: 9 ára og yngri
5 km: 10-11 ára, drengir og stúlkur
7.5 km:12-15 ára, drengir og stúlkur
15 km: 16 ára og eldri, konur
30 km: 16 ára og eldri, karla

Myndir má finna hér og úrslit má finna hér.

 

Íslandsgangan 2017, þremur göngum lokið

Nú tókst að ljúka Bláfjallagöngunni, reyndar með örlítilli seinkun. Þátttakendur voru fleiri en nokkru sinni áður og af þeim 113 sem komu í mark gengu 74 lengstu vegalengd, 20 km, og fengu Íslandsgöngustig. Við það tvöfaldaðist fjöldi þeirra sem komist hafa á blað og gott betur, voru 57 fyrir Bláfjallagönguna en eru nú 117. Uppfærða stigatöflu má sjá hér á vefnum, leitið að Íslandsgöngunni undir „Æfingar og keppni“ í svörtu línunni hér fyrir ofan.

Bláfjallaganga möguleg 1-2 tíma seinkun á morgun

Sæl öll

Það lítur vel út með veðrið og Bláfjallagönguna á morgun, nema bara 1 – 2 tímum seinna. Það er að ganga niður veðrið um það leyti sem við ætlum að starta, þannig að það er útlit fyrir smá seinkun á morgun.

Endilega fylgist með á facebook síðu félagsins, eða heimasíðu félagsins í fyrramálið um 8-leytið.

Kveðja, mótanefnd.

p.s. kökurnar og útdráttarverðlaunin bíða eftir ykkur í sal Árbæjarkirkju eftir keppni.

Bláfjallagangan og Strompaskautið um helgina

Minnum á Bláfjallagönguna núna á laugardaginn 18. mars sem er almenningsganga sem allir ættu að skella sér í! Þá er á sunnudaginn 19. mars ný keppni, Strompaskautið, þar sem keppt er með frjálsri aðferð í lengri vegalengdum. Nánari upplýsingar hér fyrir neðan. Til að skrá sig þarf að smella á viðkomandi mynd efst í dálknum hægra megin á síðunni en þá ætti að birtast skráningarform. Athugið að skráningar í Bláfjallagönguna frá því í febrúar gilda enn svo þeir sem voru forskráðir þurfa ekki að skrá sig aftur. Til að glöggva sig á því hverjir eru skráðir í Bláfjallagönguna má sjá forskráða keppendur með því að smella hér.