Aðventu- og skíðakveðja

Kæru félagar í Ulli.
Nú á næstu vikum, þ.e. þegar amstri jóla og áramóta lýkur, mun vetrarstarfið bresta á af fullum þunga, enda erum við búin að leggja inn pöntun fyrir ríflegu magni af snjó. Fyrsta sending kom á dögunum og von er á meiru fljótlega.
Til að starfið gangi sem best, þurfa félagar að vera virkir og því ætlum við að ná sem flestum á kynningarfund félagsins sem haldinn verður annað kvöld, miðvikudaginn 6. desember kl. 20:00 í húsnæði ÍSÍ í Laugardal.
Hverjum alla áhugasama til að mæta og takið gjarnan með gesti, sem hafa hug á að prófa þá frábæru íþrótt sem skíðagangan er.
Öllum skráðum félögum ætti nú að hafa borist greiðsluseðill á heimabanka og í dag hefur stór hluti okkar greitt árgjaldið, sem er gleðiefni. Fyrir það erum við þakklát!
Við viljum því hvetja þá sem eiga eftir að greiða árgjaldið að gera það sem fyrst, til að þeir geti framvísað skírteini þegar þeir sækja um árskort á skíðasvæðin, því skírteinið veitir góðan afslátt af þeim kaupum.
Félagsskírteini verða send út á næstunni, en ef félagsskírteini hefur ekki borist við kaup á árskorti á skíðasvæðin, er hægt að framvísa kvittun vegna greiðslu árgjalds.
 Jafn lítið félag og Ullur er, þarf á framlagi allra félaga að halda til að hægt sé að halda uppi öflugu starfi. Nú í haust hafa verið unnar miklar endurbætur af harðduglegum sjálfboðaliðum á skálanum og samstarf við skíðasvæðin eflt upp á að halda úti góðum troðnum brautum við hæfi allra. Þessu fáum við áorkað með öflugu starfi sem kostar sitt.
Það stefnir í glæsilegan skíðavetur og það er undir okkur öllum komið hversu öflugt félagsstarfið verður.
Aðventu- og skíðakveðja
Stjórn Ullar.
Auglýsingar

Bláfjallaganga möguleg 1-2 tíma seinkun á morgun

Sæl öll

Það lítur vel út með veðrið og Bláfjallagönguna á morgun, nema bara 1 – 2 tímum seinna. Það er að ganga niður veðrið um það leyti sem við ætlum að starta, þannig að það er útlit fyrir smá seinkun á morgun.

Endilega fylgist með á facebook síðu félagsins, eða heimasíðu félagsins í fyrramálið um 8-leytið.

Kveðja, mótanefnd.

p.s. kökurnar og útdráttarverðlaunin bíða eftir ykkur í sal Árbæjarkirkju eftir keppni.

Ný námskeið að hefjast, eitthvað fyrir alla!

Nú fara að hefjast ný námskeið hjá Skíðagöngufélaginu Ulli og það má finna eitthvað fyrir alla!

Félagið stendur enn á ný fyrir þriggja vikna æfingalotum fyrir félagsmenn frá 9. mars 2017 en æfingarnar eru annars vegar ætlaðar nýjum félagsmönnum, lítt vönu skíðagöngu, til dæmis hlaupurum sem stefna á að verða Landvættir, og hins vegar þeim sem eru vanir á gönguskíðum.

Þá fer einnig af stað tveggja vikna námskeið í skíðaskauti en allir þeir sem hafa verið áður á námskeiðum hjá Ulli geta skráð sig í þennan hóp.

Að lokum viljum við minna á samæfingahópinn okkar sem hittist einu sinni í viku, á miðvikudögum kl. 18:00, en hann er fyrir þá sem vilja æfa reglulega í skemmtilegum hópi lengra kominna og/eða ætla sér að keppa t.d. í Fossavatnsgöngunni.

Hér fyrir neðan má sjá nánari upplýsingar um hópana:

Æfingalota:  Ullur stendur enn á ný fyrir þriggja vikna æfingalotum fyrir félagsmenn frá 9. mars 2017. Æfingarnar eru annars vegar ætlaðar nýjum félagsmönnum, lítt vönu skíðagöngu, til dæmis hlaupurum sem stefna á að verða Landvættir, og hins vegar þeim sem eru vanir á gönguskíðum.

Farið verður í alla helstu þætti skíðagöngunnar eins og skíðatækni, klæðnað, smurningu og fleira. Þjálfari er Einar Ólafsson, auk annarra sem hafa mikla reynslu af skíðagöngu og kennslu. Mögulega er hægt að færa fólk á milli hópa eftir getu og aðstæðum þegar líður á æfingatímabilið.

Æft tvisvar í viku, sex skipti samtals. Æfing/kennsla verður á fimmtudögum kl. 18:00 og laugardögum kl. 10:30. Fyrsta kennsla verður fimmtudaginn 9. mars kl. 18:00 í Bláfjöllum. Hluti af námskeiðinu verður smurningskennsla og verður hún haldin þegar/ef veður verður vont einhvern daginn. Fylgist með á Facebook síðu Ullar varðandi breytingar vegna veðurs. Athugið að laugardaginn 18. mars verður Bláfjallagangan, svo æfinguna þann dag þarf að færa til.

Þeir sem eru með smurningsskíði (ekki riffluð) þurfa að vera búnir að undirbúa skíðin sín fyrir settan tíma æfingarinnar hverju sinni. Einungis er hægt að fá leigð skíði ef æfingin fer fram í Bláfjöllum.

Verð fyrir æfingalotu, 6 skipti: 12.000.-

Skautaskíði:  Kennt tvisvar í viku, fjögur skipti samtals. Allir þeir sem hafa verið áður á námskeiðum hjá Ulli geta skráð sig í þennan hóp. Æfing/kennsla fyrir Skautahóp verða á fimmtudögum kl. 19:30 og laugardögum kl. 12:00. Fyrsta kennsla verður fimmtudaginn 9. mars kl. 19:30. Fylgist með á Facebook síðu Ullar varðandi breytingar vegna veðurs. Athugið að ekki er hægt að fá leigð skautaskíði. Laugardaginn 18. mars verður Bláfjallagangan, svo æfinguna þann dag þarf að færa til.

Verð fyrir skautaskíði, 4 skipti: 8.000.-

Samæfingar:  Ullur stendur fyrir sameiginlegum æfingum, einu sinni í viku, á miðvikudögum kl. 18:00 fyrir þá sem vilja æfa reglulega í skemmtilegum hópi lengra kominna og/eða ætla sér að keppa t.d. í Fossavatnsgöngunni. Ekki verður um hefðbundna kennslu á tækni að ræða, en Einar Ólafsson mun stjórna þessum æfingum auk annarra sem hafa mikla reynslu af skíðagöngu og kennslu. Fylgist með á Facebook síðu Ullar varðandi breytingar vegna veðurs.
Verð fyrir reglulegar samæfingar: 8.000.-

Skráning og greiðslur:

Nauðsynlegt er að fólk skrái sig á námskeiðin og má gera það með því að smella á viðkomandi mynd efst í dálkinum hér til hægri og fylla út eyðublað sem þá birtist. Skráningar taka gildi þegar greiðsla skráningargjalds hefur farið fram.

Greiðsluupplýsingar:

Skíðagöngufélagið Ullur
Kennitala: 600707-0780
Reikningsnúmer: 0117-26-6770
Skýring æfingalota: AEF9MAR
Skýring skautaskíði: SKA9MAR
Skýring samæfingar: SAM8MAR
Kvittun sendist til: ullarpostur@gmail.com

Vinsamlega greiðið aðeins eitt gjald í hverri færslu þannig að hægt sé að sjá fyrir hvaða þátttakanda er verið að greiða eða sendið póst á ullarpostur@gmail.com þar sem kemur fram hver borgar fyrir hvern.

Mikilvægar upplýsingar:

Námskeiðin/æfingar fara fram við skála Ullar í Bláfjöllum og í Heiðmörk. Fer það eftir veðri og aðstæðum hverju sinni.  Á heimasíðu Ullar má sjá hvernig hægt er að finna skálann, finnið „Um félagið“ – „Skálinn“ eða smellið hér.

Fyrir miðvikudags- og fimmtudagskennsluna er gott að vera með höfuðljós. Í Heiðmörk verða allir að vera með ljós. Þegar tvísýnt verður um veður í Bláfjöllum munum við auglýsa hvort af æfingu verður og/eða hvort við flytjum hana í Heiðmörkina eða á golfvöllinn í Garðabænum eða á golfvöllinn hjá Oddi.

Vakin er athygli á því að eins og á öðrum skíðasvæðum þarf að kaupa skíðakort sem gildir í brautirnar í Bláfjöllum en það er ekki innifalið í námskeiðum sem haldin eru á svæðinu. Smelltu hér til að skoða gjaldskrá skíðasvæðisins í Bláfjöllum, en dagskort kostar 950 kr. Hægt er að greiða fyrir dagskort með korti í skála Ullar.

Bláfjallagöngunni aflýst vegna fannfergis

Bláfjallagöngunni er hér með formlega aflýst með öllu þessa helgi.

Þó við fögnum aðvitað þessu gríðarlega fannfergi þá er þetta því miður svona.

Áætlað er nú að halda gönguna laugardaginn 18. mars og vonumst við til að sjá sem höfðu skrá þá og vonandi fleiri!
Á sunnudeginum 19. mars er svo planað að halda annað mót þar sem keppt verður í lengri vegalengdum í skauti eða með frjálsri aðferð og munu Bláfjallagangan og mótið á sunnudeginum gilda sem Reykjavíkurmeistaramót.

Höldum upp á þetta gríðarlega fannfergi og förum út að leika! Sjáumst í Bláfjöllum helgina 18. -19. mars!
Kv. mótanefndin

SEINKUN á Bláfjallagöngunni

Vegna gríðarlegs fannfergis sem við að sjálfsögðu fögnum, þá er nú áætlað að fyrsta start verði kl. 13:00. Við ætlum sem sagt að halda gönguna en seinkum fyrsta starti til kl. 13:00 (börn og þeir sem ætluðu að starta á undan). Restin áætlað að starta 13:15.

Þetta er allt með þeim fyrirvara að við komumst uppeftir fyrir kl. 11:00 til að undirbúa brautina.

Kveðja, mótanefnd

Bláfjallagangan á morgun

Við minnum á Bláfjallagönguna á morgun sem allir ætla auðvitað að mæta í! Þótt veðrið sé ekki að leika við okkur í dag þá á að lægja og stytta upp á morgun þegar gengið verður svo við höldum okkar striki og vonumst auðvitað til að sjá sem flesta taka þátt.

Vil viljum minna á forskráninguna og hvetjum fólk til að nýta sér það þar sem það flýtir fyrir afgreiðslu númera í fyrramálið. Skráningarformið má finna efst á síðunni hægra megin. Við höfum lengt frestinn til að skrá sig í forskráningunni til kl 20:00 í kvöld en svo er aðvitað hægt að skrá sig á staðnum.

Athugið að kaffisamsætið verður í safnaðarheimili Árbæjarkirkju en ekki á áður auglýstum stað.

Sjáumst hress á morgun í Bláfjöllum!