Gleðifréttir úr fjallinu

Það er ánægjulegt að tilkynna að Skíðasvæðið / Samtök Sveitarfélaga á Höfuðborgarsvæðinu hafa samþykkt fjárveitingu vegna salernishúss fyrir skíðagönguiðkendur í Bláfjöllum og aðra notendur suðursvæðisins.  Staðsetning hússins verður við horn bílastæðisins og skíðagöngusvæðisins og standa vonir til að húsið verði risið fyrir næsta vetur.   

Skíðagöngufélagið Ullur er búið að berjast fyrir þessu verkefni í mörg ár og því afar ánægjulegt að það sé í höfn, enda mun það gjörbreyta aðstöðu fyrir skíðagönguiðkendur.

Dæmi um mögulega útfærslu – Salernishús við Esjurætur

Aðalfundur Ullar 19. maí 2021

Aðalfundur Skíðagöngufélagsins Ullar verður haldinn í húsnæði ÍSÍ sal D, Íþróttamiðstöðinni í Laugardal, miðvikudaginn 19. maí 2021 kl. 20:00.
 
Vegna fjöldatakmarkana þá biðjum við ykkur að skrá ykkur hér: https://bit.ly/2ShFrDZ
 
Málefni sem félagar óska eftir að tekin verði fyrir á fundinum skulu hafa borist stjórn minnst viku fyrir aðalfund á netfangið stjornullar@gmail.com. Mál sem berast eftir að sá frestur er liðinn verða ekki tekin fyrir nema 2/3 fundarmanna samþykki það. Rétt til fundarsetu með öllum réttindum hafa félagar.
 
Núverandi stjórn Ullar býður sig fram til áframhaldandi stjórnarsetu.
 
Dagskrá aðalfundar:
1. Fundarsetning
2. Kosnir fundarstjóri og fundarritari
3. Lögð fram ársskýrsla stjórnar fyrir liðið starfsár og umræða um hana
4. Skýrslur nefnda
5. Lagðir fram endurskoðaðir ársreikningar, umræða og atkvæðagreiðsla
6. Fjárhagsáætlun næsta starfsárs
7. Lagabreytingar ef fyrir liggja
8. Stjórnarkjör:
a) kosinn formaður
b) kosnir fjórir aðalstjórnarmenn
c) kosnir tveir varamenn í stjórn
d) kosinn skoðunarmaður og annar til vara
9. Aðrar tillögur sem borist hafa til stjórnar
10. Önnur mál
11. Fundarslit
 
Félagar í Ulli eru hvattir til að mæta og taka þátt í að móta starf félagsins.

Þriðja degi SMÍ lokið

Þriðja og síðasta degi Skíðalandsmóts Íslands (SMÍ) er nú lokið í Hlíðarfjalli á Akureyri. Ræst var með hópstarti og var gengið með hefðbundinni aðferð.

Hjá körlunum voru gengnir 10 km og Íslandsmeistari varð enn og aftur Snorri Einarsson frá Ulli en hann sigraði með miklum yfirburðum. Annar varð Dagur Benediktsson frá Ísafirði og þriðji varð svo Ragnar Gamalíel Sigurgeirsson frá Akureyri. Í kvennaflokki voru gengnir 5 km og sigraði Linda Rós Hannesdóttir frá Ísafirði, Gígja Björnsdóttir Akureyri varð önnur og Fanney Rún Stefánsdóttir Akureyri varð þriðja. Hægt er að skoða nánari úrslit hér.

Ullur óskar Snorra sérstaklega til hamingju með góðan árangur, sem er gott veganesti þegar æfingar hefjast fyrir Ólympíuleikana í Beijing 2022.

Sigurvegarar í karlaflokki, 10km hefðbundið – Mynd: ski.is

Öðrum degi SMÍ lokið

Öðrum degi Skíðalandsmóts Íslands (SMÍ) er nú lokið en keppt er í Hlíðarfjalli á Akureyri. Keppt var með frjálsri aðferð og gengu karlarnir 15 km en konurnar 10 km. Hlutskarpastur karla megin var Ullungurinn Snorri Einarsson en kvenna megin var það Gígja Björnsdóttir frá Akureyri. 

Hægt er að lesa nánar um úrslit dagsins hér.

Snorri Einarsson, Ulli – Ljósmynd/Skapti Hallgrímsson

Á morgun lýkur svo keppni en þá verður keppt í 10/5 km göngu með hefðbundinni aðferð og hefst keppni kl. 17:00

Fyrsta degi SMÍ lokið

Skíðalandsmót Íslands (SMÍ) hófst í Hlíðarfjalli á Akureyri í gærkvöld þar sem keppt var í sprettgöngu. Íslandsmeistari í karlaflokki varð Snorri Einarsson í Ulli eftir æsispennandi endasprett á móti Degi Benediktssyni SFÍ en skera þurfti úr um úrslit með myndbandsupptöku og munaði hársbreidd á þeim. Íslandsmeistari í kvennaflokki varð Linda Rós Hannesdóttir SFÍ.

Hægt er að lesa nánar um úrslit gærdagsins hér.

Í dag er svo keppt í 10/15 km með frjálsri aðferð og hefst keppni kl.17:00.

Bláfjallagönguni er aflýst 2021

[Engligh below – Blafjallagangan cancelled]

Því miður þá verður gangan ekki vegna snjóleysis þetta árið!

Við þökkum ykkur öllum kærlega fyrir bjartsýnina með okkur og munum við endurgreiða öllum á næstu dögum!Sjáumst að ári eða laugardaginn 19. mars 2022. Minnum ykkur á Bláfjallaþríþrautina sem verður haldin sumardaginn fyrsta þann 22. apríl. Skráning og nánari upplýsingar https://fb.me/e/X4nbKL1w

Farið vel með ykkur og verið dugleg að fara út að leika.

——————————————-

Bláfjallagangan is CANCELLED 2021

Unfortunately, due to lack of snow and weather conditions, the Bláfjallagangan is cancelled for 2021.

We thank you for sharing our optimism this winter and will fully reimburse the entrance fee in the next days.

We would like to remind you that the Bláfjallaþríþrautin (Blafjoll triathlon) is planned on the first day of summer April 22nd. Registration and more information can be found on the event page on Facebook: https://fb.me/e/X4nbKL1w

Take good care and see you all next year March 19th, 2022 in Bláfjallagangan.

Bláfjallagöngunni frestað um óákveðinn tíma

Þriðjudaginn 20. apríl verður tilkynnt hvort eða hvenær Bláfjallagangan verður haldin þetta árið. Erum að hugsa laugardaginn 24. apríl. Takk fyrir þolinmæðina.

Vegna gildandi samkomutakmarkana þá getum við því miður ekki haldið gönguna þann 10. apríl n.k. Staðan verður endurmetin reglulega út frá framvindu faraldurs, takmarkana og eins snjóalaga. Við munum endurgreiða öllum þeim sem hafa skráð sig ef gangan fellur niður.

Spor eru lögð daglega í Bláfjöllum þegar veður og snjór leyfir.

Bláfjallagöngunni FRESTAÐ til 10. apríl 2021

Vegna veðurs undanfarna daga getum við ekki haft gönguna á laugardaginn. Við stefnum ótrauð á að halda hana 10. apríl n.k. í staðin.

Ástæður frestunar

  • Rigning síðustu daga
  • Hitastigið
  • Troðari getur ekki farið inn á svæðið og unnið brautir
  • Allt á floti

Við þökkum ykkur öllum, sem hafið skráð ykkur.  Skráning er ennþá í fullum gangi á netskraning.is og við hlökkum til að sjá ykkur 10. apríl

Bláfjallagangan 2021 – skráning hafin!

Nú er komið að því! Bláfjallagangan fer fram laugardaginn 20. mars n.k. og höfum við nú opnað fyrir skráningu á https://netskraning.is/blafjallagangan/ Við erum afskaplega glöð að hafa fengið grænt ljós á að halda gönguna, en þó er ljóst að það verða nokkur atriði ekki með sama sniði og undanfarin ár. Vegna Covid verða ekki drykkir eða önnur næring í boði keppnishaldara í ár og keppendur verða því að bera með sér eigin drykki og aðra orku sem þeir vilja hafa. Á leiðinni verður þó stefnt að því að vera með í brautinni mannaðar stöðvar með aðstöðu fyrir keppendur að nærast. Kaffihlaðborð verður því miður ekki að göngu lokinni. Við stefnum að því að eiga frábæran dag með ykkur öllum, með skemmtilegri göngu, útdráttarverðlaunum og góðri stemningu. Allir þátttakendur fá frítt í sund í Ásvallalaug í Hafnarfirði þennan dag.

Félagsfundur um hugmyndir framtíðarskipulag skíðasvæðanna á höfuðborgarsvæðinu

Kæru félagar!

Undanfarið hefur skapast töluverð umræða um framtíðarskipulag skíðasvæðanna á höfuðborgarsvæðinu. Því langar okkur hjá Ulli að kynna fyrir félagsmönnum drög að hugmyndum sem unnið hefur verið í um framtíðarskipulag skíðagöngusvæðanna og heyra ykkar skoðanir. Við bjóðum því til fundar mánudaginn 15. mars klukkan 20:00 í ÍSÍ Laugardal, Engjavegi 6. Skráning þarf að eiga sér stað vegna fjöldatakmarkana vinsamlegast skráið þátttöku hér: https://forms.gle/4jNG3qTavkZ3xMM39 Ef þú kemst ekki þá er velkomið að senda okkur línu á stjornullar@gmail.com með þínum áherslum/hugmyndum. Hlökkum til að sjá ykkur.