Lokahátíð Ullunga í dag, 6. maí, kl.12:00

Lokahátíð Ullunga verður í Bláfjöllum í dag og þurfa allir að mæta fyrir kl 12:00 en þá verður ræst í leika dagsins en að þeim loknum verða grillaðar pylsur handa öllum.

Í fyrradag var lagt um 5 km spor sem áreiðalega hefur haldist nokkuð gott ef vélsleðamenn hafa ekki ekið meira um það en búið var að gera í gærmorgun. Nægur snjór er um alla heiði og auðvelt að fara 20-30 km hring utan spora.

Í morgun kl 08 var 4-5 °frost og því áreiðanlega mikið harðfenni en við vonumst til að sólin verði búin að mýkja það um hádegisbil.
Sjáumst á eftir
Þóroddur F.

Bláfjöll – spor

Það var lagt spor í Bláfjöllum í dag það ég best veit og mun það nýtast vel í góðviðrinu um helgina. Hætt er við nokkurri fínni ösku í snjónum, miðað við hvernig ástandið var 1. maí en hugsanlegt er að við ferð troðarans við sporlagninguna hafi óhreini snjórinn blandast hreinni snjó sem var undir.
Sjáumst í fjöllunum, ekki sýst í slúttinu á sunnudaginn.
Þóroddur F.

Enn einn dýrðardagur í Bláfjöllum!

Það er ekki síðra að ganga á skíðum á sumrin en á veturna, a.m.k. þegar veðrið og færið er eins og var í Bláfjöllum í dag. Næstum logn, sólskin og líklega um þriggja stiga hiti. Brautin var góð þó að sporið væri á stöku stað dálítið grunnt, hringurinn lá upp að Heiðartoppi og inn í Kerlingardal og mældist 12,8 km. Það komu nokkuð margir við í skálanum en brautin hefði alveg borið fleiri! Nú er um að gera að nýta sér þetta góða vorveður og færi hvort heldur er til að fara í skemmtilegar göngur um Bláfjallasvæðið eða til að fínpússa formið og tæknina fyrir hina miklu uppskeruhátíð skíðagöngumanna, Fossvatnsgönguna á Ísafirði sem fer fram um næstu helgi og Reykjavíkurmeistaramót sem líklega verður haldið á Bláfjöllum 1. maí.
Smellið á myndirnar til að sjá þær stærri!

Einstaklega fallegur dagur!

Hringur dagsins

Sumarblíða í Bláfjöllum

Gleðilegt sumar!
En þó að sumarið sé komið er engin ástæða til að hætta að fara á skíði. Það hafa nú verið troðnar göngubrautir í Bláfjöllum, a.m.k. 5 km hringurinn, upp á Heiði og inn í Kerlingardal. Færið hefur sjálfsagt verið dálítið hart í morgun eftir næturfrostið en nú er að verða frostlaust og sumarsólin fer að mýkja snjóinn. Góða skemmtun!

Frábær veðurspá fyrir Sumardaginn fyrsta – skellum okkur á skíði og grillum saman í hádeginu!

Svona var í Bláfjöllum þegar göngumóti var aflýst vegna veðurs. Það verður enn betra sumardaginn fyrsta!

Veðurspáin fyrir Sumardaginn fyrsta er frábær og því er um að gera að taka daginn snemma og drífa sig í Bláfjöll á skíði á meðan að færið er gott.
Við hjá Ulli ætlum að standa fyrir grilli um hádegið og því er upplagt að taka með sér pylsur og pylsubrauð, eða samloku í samlokugrillið og eiga saman notalega stund í hádeginu.
Grill verður á staðnum kl. 12:30 – 14:00 og við verðum með tómatsósu, sinnep, remúlaði, steiktan og hráan lauk. Það er því alveg nóg að taka með sér eitthvað á grillið og drykki.
Við minnum á að hægt er að fá lánuð skíði fyrir krakkana án kostnaðar, en leiga á skíðabúnaði fyrir fullorðna er einungis 2.000 kr.
Hverjum alla til að drífa sig í Bláfjöll og fagna sumri í skemmtilegum félagsskap J
Stjórn Ullar

Bláfjöll í dag páskadag – spor

Gleðilega páska.
Ég var að ræða við Einar rekstrarstjóra skíðasvæðanna og þó það sé strekkingur á svæðinu verður lagt 5 km spor sem verður tilbúið fyrir kl 12 í dag. Samkvæmt Belgingi á að lægja eftir hádegið svo það er um að gera að koma uppeftir og taka góða æfingu fyrir morgundaginn.
Ég geri ráð fyrir að Gunnar Birgis verði með æfingu fyrir börn og unglinga um eða upp úr hádeginu og setur hann væntanlega upplýsingar um það á fésbókina og sendir Andrésar-keppendum tölvupóst.
Þóroddur F.

Gott skíðafæri í Bláfjöllum!

Þóroddur formaður hringdi úr Bláfjöllum. Þar var suddi en þokan þó ekki svartari en svo að vel mátti greina Strompagíginn og dálítið sást upp eftir hlíðunum. Skíðafæri var hins vegar ágætt þó að sporið, sem lagt var í fyrradag, væri svolítið farið að láta á sjá. Það er því vel hægt að taka góða æfingu fyrir Bláfjallagönguna á mánudaginn, þó betra að klæða af sér mestu bleytuna með góðum regngalla. Og allar veðurspár benda til ágætisveðurs á mánudaginn, sjá t.d. hér: http://www.yr.no/sted/Island/Su%C3%B0urland/Bl%C3%A1fj%C3%B6ll~3418149/. Það er því engin ástæða til annars en að drífa sig í Bláfjallagönguna. Og fyrir alla muni skráið ykkur hér á síðunni (efst í dálkinum hér til hægri). Það hjálpar okkur mikið, segir okkur t.d. hvað við þurfum að baka mikið af kökum!

Skíðaspor í Skálafelli í dag laugardag 24. mars

Allt skíðagöngufólk á sv-horninu fylgist með fréttum úr Skálafelli á heimasíðu skíðasvæðanna en þar er unnið að því að leggja skíðaspor, en lokað er í Bláfjöllum. Sjáumst í sólinni í Skálafelli.
Þóroddur F.

Skíðafæri á Miklatúni og sjálfsagt víðar.

Var að koma frá þvi að ganga 3 hringi á Miklatúninu, allt í lagi skíðafæri – ekki spariskíði, þarf að passa sig þar sem farið er yfir göngustíga þar kann að vera grunnt á mölina.

Engin afsökun að hafa ekki æfingu. Ef bætir á snjóinn og ekki viðrar í fjöllin mætti alveg skoða að halda innanfélagsmót á Mikltúninu um helgina fyri þá sem ekki fara í Hermannsgönguna á Akureyr. Er einhver áhugi á því?.
Þóroddur F.

4. mars Allir í fjöllin.

Allir í fjöllin, spor upp á heiði 10 km og Grindaskörð 14 km að auki 2 og 5 km.
Íslendingum gengur vel í Vasagöngunni. Magnús Eiríksson væntanlegur fyrstur þeirra á um 5 klst. 10 mín.
Nýtt met var í göngunni 3:38:41 og var það Jörgen Brink (S) sem sigrar í þriðja sinn í röð.
Þóroddur F