Um Íslandsgönguna 2012

Nú er öllum mótum Íslandsgöngunnar 2012 lokið en henni lauk að vanda með glæsilegri Fossavatnsgöngu. Þótt brennandi áhugi skíagöngumanna á Íslandsgöngunni sé ekki alltaf augljós eru áreiðanlega ýmsir sem hefðu gaman af að velta fyrir sér úrslitunum. Ekkert hefur enn birst um þau á vefsíðu Íslandsgöngunnar, síðasta hreyfing þar er frá því í haust þegar mótaskráin var kynnt, og þess vegna hefur svolítil samantekt verið sett á þennan vef. Það skal tekið fram að sá, sem það gerir, hefur ekkert umboð til þess frá forsvarsmönnum Íslandsgöngunnar og engin ábyrgð er tekin á að öll stig séu rétt reiknuð. Leiðréttingar og ábendingar eru vel þegnar. En hér má sjá lokastöðuna:  Úrslit Íslandsgöngunnar 2012

Það er ýmislegt athyglisvert í þessum tölum. Sem dæmi má nefna að aðeins ein kona lauk þremur göngum sem er tilskilinn lágmarksfjöldi til að komast á verðlaunapall. Aðeins einn lauk fleiri en þremur göngum en sá lauk reyndar öllum fimm. Aðeins einn lauk þremur göngum án þess að komast á verðlaunapall. Þetta samrýmist ekki vel hugmyndum sumra um að almenningsgangan Íslandsgangan eigi að höfða til sem allra flestra og hvetja fólk til að taka þátt í keppni á gönguskíðum.

Það voru 76 sem fengu stig í enhverri göngu. Ef litið er á fjölda þeirra sem fengu stig í einstökum göngum sést að Strandagangan er óumdeilanlega Íslandsganga nr. 1, a.m.k. þennan veturinn. Það er athyglisvert að það eru lengstu göngurnar (Fossavatnsgangan – 50 km, Orkugangan – 35 km (átti að vera 60 km)) sem skila fæstum með stig. Það voru 21 sem fengu stig úr lengstu vegalengd Fossavatnsgöngunnar en ef 20 km gangan þar hefði verið látin gilda til stiga hefðu 55 komist á blað. Það má því velta því fyrir sér hvort hin stórglæsilega Fossavatnsganga, þar sem eitt helsta markmið með 50 km göngunni er að fá sem flesta og öflugasta erlenda kappa til landsins handa íslenskum göngumönnum að reyna sig við, kunni að vera vaxin upp úr hinum þrönga búningi Íslandsgöngunnar, almenningsgöngu sem á að hvetja sem allra flesta til að ganga á skíðum. Það skal þó skýrt tekið fram að hér er alls ekki verið að gagnrýna Fossavatnsgönguna, hún er stolt allra íslenskra skíðagöngumanna og allir vilja veg hennar sem mestan.

Hugsum málið, er Íslandsgangan eins og hún ætti að vera og ef ekki, hvernig ætti hún þá að vera?

Ullungar í Fossavatnsgöngu

Startið í 20 km göngu. Ef myndin er stækkuð með því að smella á hana má hér greina Ullungana Gerði Steinþórsdóttur (nr. 42, lengst til hægri, með rauða húfu), Ragnhildi Jónsdóttur (74), Árna Sigurðsson (41), Ingvar Einarsson (75), Magnús Björnsson (í svartri úlpu sem hylur rásnr. 47), Guðrúnu Pálsdóttur (18) og Þórhildi S. Sigurðardóttur (5).

Fossavatnsgangan á Ísafirði fór fram laugardaginn 28. apríl. Um tíma leit út fyrir að gangan yrði illa fyrir barðinu á veðri eða öllu heldur veðurspám eins og sumar aðrar göngur í vetur en með þrautseigju þeirra sem að göngunni stóðu tókst að ljúka henni með glæsibrag. Það var hárrétt ákvörðun hjá skipuleggjendum að fresta göngunni um þrjár klukkustundir því þótt frestunin kunni að hafa gert erfiðara fyrir með kaffihlaðborð, verðlaunaafhendingu og frágang úrslita fór gangan sjálf fram við bestu aðstæður sem í boði voru þennan daginn og um tíma yljaði sólin þeim sem biðu eftir skíðagörpunum við gönguhúsið á Seljalandsdal.

Fyrstur í mark í 50 km göngunni kom Markus Jönsson frá Svíþjóð. Aðeins 53 sekúndum síðar kom fyrsta konan í mark, en sú er fyrrverandi heimsmeistari í skíðagöngu, Aino-Kaisa Saarinen frá Finnland. Fyrstur íslenskra keppenda varð Kristbjörn R. Sigurjónsson SFÍ en Stella Hjaltadóttir SFÍ varð fyrst íslenskra kvenna. Það er athyglisvert að Kristbjörn (Bobbi sjálfur, aðaldriffjöður Fossavatnsgöngunnar) keppir í flokki 50-65 ára og sá sem kom í mark annar af 73 keppendum í 20 km göngu, Kristján Rafn Guðmundsson SFÍ, keppir í flokki 66 ára og eldri. Þetta er sýnir svo ekki verður um villst að skíðagöngu geta menn stundað með góðum árangri áratugum saman og það er full ástæða til að hvetja afreksíþróttamenn í öðrum greinum til að snúa sér að skíðagöngu þegar árin færast yfir.

Ullungar áttu myndarlegan hóp í göngunni. Af þeim 215 sem luku göngunni voru líklega um 24 frá Ulli. Talan er ekki alveg nákvæm, ekki er víst að allir félagsmenn hafi skráð sig í nafni félagsins. Vitað er um einn erlendan gest félagsmanns sem er skráður fyrir Ull og einnig um félagsmann sem ekki gat verið þekktur fyrir annað en að skrá sig fyrir sitt upprunafélag í þessari göngu. En það er hvort tveggja hið besta mál og breytir ekki því að u.þ.b. níundi hver keppandi í þessari göngu, sem er óneitanlega með glæsilegustu íþróttaviðburðum sem fram fara á Íslandi, kom frá Ulli.

Nokkrir Ullungar komust á verðlaunapall. Skemmtilegast er að lesa úrslitin í 50 km göngu kvenna, 16-34 ára, en þar voru Ullarstúlkurnar Hrefna Katrín Guðmundsdóttir og Málfríður Guðmundsdóttir þær einu sem öttu kappi við finnska heimsmeistarann. Í 50 km göngu karla 35-49 ára varð Ullargesturinn Peder Holst í 3. sæti og í 50 km göngu karla 50-65 ára varð Þórhallur Ásmundsson í 3. sæti. Í 20 km göngu kvenna 66 ára og eldri hlaut Gerður Steinþórsdóttir gullverðlaunin.

Myndir frá göngunni eru væntanlegar í myndasafnið áður en langt líður.

Heildarúrslit í Fossavatnsgöngunni 2012 má lesa hér.

Fossavatnsgangan 28. apríl – hvatning að vestan

Svona eru aðstæður í brautinni (22/4). Nógur snjór, hreinn og fallegur!

Sælir skíðamenn,

Nú líður óðum að stærsta og flottasta skíðaviðburði ársins hjá okkur gönguskíðamönnum. Skráningar hafa gengið vel en enn er pláss til að taka á móti fólki. Veðurhorfur eru fínar eins og alltaf, góða skapið er alltaf ríkjandi hér á Ísafirði þennan dag ársins. Nú er því ekki eftir neinu að bíða, skráðu þig strax og vertu með!!!!

Með kveðju/Best regards/Med vennlig hilsen/Hiihtoterveisin
Kristbjörn R.Sigurjónsson

Ullungar á Andrés

Ullur sendi vaska sveit á Andrésarleikana, sem kom heim af mótinu með 3 gull, 2 silfur, 1 brons og mörg bros.

Síðasta daginn fengu Nökkvi Stefánsson og Bryndís Eiríksdóttir medalíur eftir þátttöku í leikjabrautinni, en sama dag átti Ullur tvær boðgöngu-sveitir, bæði yngri og eldri.
Auk Nökkva og Bryndísar kepptu Arna, Hlín og Málfríður Eiríksdætur, Birgitta Birgisdóttir, Halla Karen Johnsdóttir, Harpa Sigríður Óskarsdóttir og Gústaf Darrason á þessu skemmtilega móti fyrri hönd Ullar, en þau má sjá á myndinni með Gunnari Birgissyni.
Til hamingju krakkar!!!

Þessi flotta mynd og 49 aðrar af Ullarungum á Andrésarleikum 2012 eru komnar í myndasafnið, smellið á “Myndasafn” í dálkinum hér til hægri!

Lokadagur Andrésarleikanna

Andrésarleikunum er lokið með boðgöngu og áttu Ullungar eina sveit í hvorum flokki.
9-11 ára, Birgitta. B, Arna E. og Hlín E lentu í 5 sæti af 11.
12-14 ára, Harpa Ó, Málfríðu E. og Gústaf D lentu í 6 sæti af 6.

Glæsileg frammistaða hjá öllum þátttakendum í Andrésarleikunum og ljóst að þátttakendur, bæði keppendur og fylgdarlið lærðu margt sem við tökum með okkur í veganesti og nýtum okkur í æfingum næsta árið.

Það var sérstaklega gaman að fylgjast með unga fólkinu sem allt lagði sig fram og gerði sitt besta, þau eru frábær fyrirmynd og verða án efa hvatning fyrir unga og aldna að stunda skíðagöngu af enn meiri krafti næsta vetur.

Líklegt er að síðasta göngumót á vegum Ullunga verði í Bláfjöllum þann 1. maí, nánar um það síðar.
Þóroddur F.

Annar dagur Andrésarleikanna

Aftur stóðu Ullungar sig allir frábærlega, allir gerðu sitt besta og ekki má fara fram á meira. Árangurinn varð eftirfarandi en hann skiptir í raun minna máli en skemmtunin og að allir lögðu sig fram. Gengið var með frjálsri aðferð sem ekki hefur verið lögð mikil áhersla á í æfingum Ullunga.
Stúlkur 8 ára og yngri. Bryndís Eiríksdóttir 5 sæti.
Drengir 8 ára og yngri. Nökkvi Stefánsson 6. sæti.
Stúlkur 9 ára. Arna Eiríksdóttir 2. sæti
Stúlkur 10 ára. Birgitta Birgisdóttir 7. sæti
Stúlkur 11 ára. Hlín Eiríksdóttir 5. sæti
Halla Karen Johnsdóttir 9. sæti
Drengir 11-12 ára Gústaf Darrason 4. sæti
Stúlkur 12 ára Harpa Sigríður Óskarsdóttir 5 sæti
Stúlkur 13-14 ára Málfríður Eiríksdóttir 1-2 sæti á sömu sekúndu og Harpa Óskarsdóttir SFS.
Þóroddur F.

Fyrsti degi á Andrésarleikunum 2012 lokið

Frábær dagur hjá unga fólkinu á Andrésarleikunum í dag, rúmlega 500 keppendur og þar af 80 í göngu. Ullungar áttu 9 keppendur sem tóku þátt í göngunni og var árangur þeirra eftirfarandi.
Stúlkur 8 ára og yngri. Bryndís Eiríksdóttir 7 sæti.
Drengir 8 ára og yngri. Nökkvi Stefánsson 6 sæti.
Stúlkur 9 ára og yngri. Arna Eiríksdóttir 1. sæti.
Stúlkur 10 ára. Birgitta Birgisdóttir 5.-6. sæti
Stúlkur 11. ára. Hlín Eiríksdóttir 2. sæti. og Halla Karen Johnsdóttir 9. sæti
Drengri 11-12 ára. Gústaf Darrason 3. sæti.
Stúlkur 12. ára. Harpa Sigríður Óskarsdóttir 5. sæti.
Stúlkur 13-14 ára. Málfríður Eiríksdóttir. 1. sæti.
Glæsileg frammistaða hjá okkar fólki og virkilega ánægjulegt að vera með þetta stóran hóp hér á Akureyri. Geta má þess að árangur Málfríðar vakti sérstaka athygli þar sem hún er óþekkt í skíðagönguheiminum og var nærri mínútu á undan næsta keppanda.
Þóroddur F.

Ullungar á Reykjaheiði

Ullingar voru fáir en fræknir norðan heiða á laugardaginn. Komust báðir á pall  með silfur og brons.

Frábært skipulag, veður og færi, þó virðast norðanmenn hafa tekið upp kvarða sunnanmanna þar sem 20 km er jafnt og tæpir 17 og bætt um betur því 60 er jafnt og 35.

Verðlaunagripir eru sérhannaðir af Húsvískum listamönnum, Arnhildi Pálmadóttur og Jónu Birnu Óskarsdóttur, mjög eigulegir og til fyrirmyndar.

Tertur og kruðerí með besta móti. Þökkum kærlega fyrir okkur,
Þórhallur og Gísli

20 km ganga karla, 50 ára og eldri. Frá vinstri: Gísli Óskarsson, Ulli (silfur), staðgengill Jónasar Jónssonar, SKA (brons) og Bárður Guðmundsson, Völsungi (gull)

35 km ganga karla 50 ára og eldri. Frá vinstri: Magnús Eiríksson, SSS (silfur), Kristbjörn R. Sigurjónsson, SFÍ (gull) og Þórhallur Ásmundsson, Ulli (brons)

Ullungarnir knáu, Þórhallur og Gísli

Staðan í Íslandsgöngunni

Nú er lokið fjórum af þeim fimm göngum Íslandsgöngunnar sem gengnar verða í vetur en Hermannsgangan, sem átti að vera á Akureyri, mun hafa verið felld niður. Á vefsíðu Íslandsgöngunnar er litlar upplýsingar að finna og því hefur hér verið tekin saman stigatafla sem vonandi er í samræmi við reglur Íslandsgöngunnar. Engin ábyrgð er þó tekin á því að hér sé farið rétt með allt.

Samkvæmt þessari töflu hefur aðeins einn maður tekið þátt í öllum göngum Íslandsgöngunnar í vetur en það er Strandamaðurinn spræki, Birkir Þór Stefánsson. Svo er að sjá að hann eigi sigurinn vísan í flokki karla 35-49 ára, jafnvel þótt hann sleppi Fossavatnsgöngunni sem hann mun varla gera. Aðeins tveir aðrir hafa lokið þremur göngum en það eru þeir Akureyringurinn Helgi Heiðar Jóhannesson (16-34 ára) og Húsvíkingurinn Kári Páll Jónasson (35-49 ára). Í öðrum flokkum en flokki karla 35-49 ára er keppnin þó spennandi og ýmsir geta krækt í gullverðlaun með góðri frammistöðu í Fossavatnsgöngunni. Þó er ljóst að engin kona í flokki 35-49 ára mun ljúka þremur göngum í ár.

Stöðuna má sjá hér:   Staðan_2012

Orkugöngunni lokið

Orkugangan var gengin laugardaginn 14. april 2012 í frábæru veðri og við góðar aðstæður. Aðeins tveir Ullungar tóku átt í göngunni að þessu sinni. Þórhallur Ásmundsson  gekk 35 km og Gísli Óskarsson 20 km. Nánari upplýsingar og úrslit eru hér á hinni nýju og myndarlegu vefsíðu Orkugöngunnar: Orkugangan, upplýsingar og úrslit