Uppskeruhátíð í Bláfjöllum

Ullungar héldu uppskeruhátíð vetarins við Þóroddsstaði í Bláfjöllum sunnudaginn 6. maí og fögnuðu unnum afrekum. Hátíðarhöldin hófust með boðgöngu þar sem fjórar sveitir öttu kappi.

Íþróttaafrekum var ekki þar með lokið því þá tók við keppnin um Ullarásinn en þar skyldu keppendur ýta sér upp með stólalyftunni í Suðurgili og hlaut sá nafnbótina sem hæst komst. Leikar fóru svo að Óskar Jakobsson varð Ullarás eftir harða baráttu við Snorra Ingvarsson og Þórhall Ásmundsson.

Þá voru grillin þanin, Þóroddur og Óskar sýndu snilldartakta við eldamennskuna og aðrir viðstaddir létu ekki sitt eftir liggja við að gera veitingunum góð skil.

Hátíðinni lauk með góðri göngu, líklega um 16 km hring, um Bláfjallasvæðið undir leiðsögn Þórodds og Trausta Tómassonar. Lítið var orðið um troðin spor en það kom ekki að sök því færið var ákaflega gott, þéttur snjór þar sem sólskinið hafði mýkt efsta lagið. Það var því leikur einn að ganga ótroðnar slóðir, jafnvel á mjóstu skíðum.

Þessi harðsnúna sveit bar sigur úr býtum í boðgöngunni: Þórhildur Sigurðardóttir, Árni Tryggvason, Óskar Jakobsson og Þórhallur Ásmundsson

Ullarásinn: “Óskar er sá Ullunga sem er ýtinn svo enginn má við hann keppa”

Allir höfðu góða lyst á pylsunum í blíðunni í Bláfjöllum

Í gönguferð með Trausta og Þóroddi

Enn er nægur snjór í Bláfjöllum og það er ástæða til að hvetja alla til að nýta hann næstu vikurnar. Þetta er í rauninni besti tíminn til skíðagöngu um Bláfjöllin, ekki síst þegar veðrið leikur við fólk eins og það gerði þennan dýrðardag.

Fleiri myndir frá hátíðinni eru komnar í myndasafnið, smellið á myndina í hægri dálkinum.

Lokahátíð Ullunga í dag, 6. maí, kl.12:00

Lokahátíð Ullunga verður í Bláfjöllum í dag og þurfa allir að mæta fyrir kl 12:00 en þá verður ræst í leika dagsins en að þeim loknum verða grillaðar pylsur handa öllum.

Í fyrradag var lagt um 5 km spor sem áreiðalega hefur haldist nokkuð gott ef vélsleðamenn hafa ekki ekið meira um það en búið var að gera í gærmorgun. Nægur snjór er um alla heiði og auðvelt að fara 20-30 km hring utan spora.

Í morgun kl 08 var 4-5 °frost og því áreiðanlega mikið harðfenni en við vonumst til að sólin verði búin að mýkja það um hádegisbil.
Sjáumst á eftir
Þóroddur F.

Vertíðarlok í Bláfjöllum

Sæl verið þið.
Við munum fagna vertíðarlokum í Bláfjöllum á sunnudaginn og hvetjum alla félagsmenn til að mæta. Ræst verður kl 12:00 í létta boðgöngu með blönduðum sveitum og einnig verður hugsanlega sprettganga. Að því loknu verða grillaðar pylsur með öllu tilheyrandi í boði Ulls.
Sjáumst á sunnudaginn.
Þóroddur F.

1. maí í Bláfjöllum

Starfsmenn skíðasvæðisins í Bláfjöllum eru í fríi þar til á miðvikudag og því verður ekki lagt spor þar í dag eða á morgun. Þrátt fyrir það er ekkert því til fyrirstöðu að fara á gönguskíði og í tilefni 1. maí að fara í skíðagöngu utan spora t.d. upp á heiði eð vestur í áttina að Selvogsgötu. Legg til að fólk sameinst um að leggja af stað kl 11:00 og síðan ræður hver og einn för.

Um næstu hegli stefnum við á síðasta mót vetrarins og uppskerugrill – nánar um það síðar.
Þóroddur F.

Góðir dagar í Bláfjöllum

Kveðja frá húsnefndarmönnum á helgarvakt:

Helgin var frábær í Bláfjöllum. Það komu milli 25 og 30 manns i skálann hvorn dag. Allir í sólskinsskapi ekki annað hægt.
Á myndinni sem tekin er inni í skálanum eru húsnefndarmennirnir Vilborg og Kristján að vanda sig við skíðaleigufrágang til handa konu sem Auður Ebenezersdóttir  var að kenna á skíði og þetta var hennar fyrsti skíðagöngutúr.

Ullungar á Andrés

Ullur sendi vaska sveit á Andrésarleikana, sem kom heim af mótinu með 3 gull, 2 silfur, 1 brons og mörg bros.

Síðasta daginn fengu Nökkvi Stefánsson og Bryndís Eiríksdóttir medalíur eftir þátttöku í leikjabrautinni, en sama dag átti Ullur tvær boðgöngu-sveitir, bæði yngri og eldri.
Auk Nökkva og Bryndísar kepptu Arna, Hlín og Málfríður Eiríksdætur, Birgitta Birgisdóttir, Halla Karen Johnsdóttir, Harpa Sigríður Óskarsdóttir og Gústaf Darrason á þessu skemmtilega móti fyrri hönd Ullar, en þau má sjá á myndinni með Gunnari Birgissyni.
Til hamingju krakkar!!!

Þessi flotta mynd og 49 aðrar af Ullarungum á Andrésarleikum 2012 eru komnar í myndasafnið, smellið á “Myndasafn” í dálkinum hér til hægri!

Sumri fagnað í Bláfjöllum

Það var fjölmennt við skála Ullunga þegar sumri var fagnað. Það var grillað í góða veðrinu og Árna Tryggvasyni er sérstaklega þakkað fyrir að koma með grillið. Hér eru fáeinar myndir:

Gott á grillinu!

Dálítið þreytt eftir að hafa prófað gönguskíði í fyrsta skipti

Hvíld eftir matinn

Frábær veðurspá fyrir Sumardaginn fyrsta – skellum okkur á skíði og grillum saman í hádeginu!

Svona var í Bláfjöllum þegar göngumóti var aflýst vegna veðurs. Það verður enn betra sumardaginn fyrsta!

Veðurspáin fyrir Sumardaginn fyrsta er frábær og því er um að gera að taka daginn snemma og drífa sig í Bláfjöll á skíði á meðan að færið er gott.
Við hjá Ulli ætlum að standa fyrir grilli um hádegið og því er upplagt að taka með sér pylsur og pylsubrauð, eða samloku í samlokugrillið og eiga saman notalega stund í hádeginu.
Grill verður á staðnum kl. 12:30 – 14:00 og við verðum með tómatsósu, sinnep, remúlaði, steiktan og hráan lauk. Það er því alveg nóg að taka með sér eitthvað á grillið og drykki.
Við minnum á að hægt er að fá lánuð skíði fyrir krakkana án kostnaðar, en leiga á skíðabúnaði fyrir fullorðna er einungis 2.000 kr.
Hverjum alla til að drífa sig í Bláfjöll og fagna sumri í skemmtilegum félagsskap J
Stjórn Ullar

Aðalfundur í kvöld

Aðalfundur félagsins er í kvöld kl 20:00 í Íþróttamiðstöðinni í Laugardal, skrifstofubygging – vesturendi og salur C.
Þóroddur F.

Úrslit í Bláfjallagöngunni

Bláfjallagangan 2012 fór fram í ágætu veðri og skíðafæri annan páskadag, 9. apríl. 44 keppendur hófu gönguna og 41 lauk henni. Úrslit má sjá hér: Úrslit í Bláfjallagöngunni 2012

Sævar Birgisson og Sigríður Drífa Þórólfsdóttir fengu farandbikara

Sú nýbreytni var tekin upp að veita farandbikara þeim karli og þeirri konu sem gengu 20 km á skemmstum tíma. Það voru þau Sævar Birgisson, Skíðafélagi Ólafsfjarðar, og Sigríður Drífa Þórólfsdóttir, Skíðafélagi Strandamanna, sem urðu fyrst til að hampa nýju bikurunum og er þeim hér með óskað til hamingju.