Bláfjallagangan

Bláfjallagangan 2012

Smellið á myndina til að sjá hana stærri!

Bláfjallagangan 2012 mun fara fram í grennd við skála Ullar í Bláfjöllum annan í páskum, mánudaginn 9. apríl 2012.  Áður hafði verið áætlað að gangan yrði 3. mars en þá reyndist óhjákvæmilegt að fresta henni vegna veðurs og ekki síður veðurútlits. Þótt nú sé nokkuð liðið á vetur er engin ástæða til að óttast snjóleysi í Bláfjöllum og skíðagöngufólk um allt land er hvatt til að fjölmenna í Bláfjöll og taka þátt í göngunni. Sem allra flestir íbúar höfuðborgarsvæðisins ættu að grípa tækifærið til að eiga skemmtilegan dag í Bláfjöllum, vonandi í frábæru páskaveðri!
Gangan er liður í Íslandsgöngunni, almenningsmótaröð Skíðasambands Íslands. Gengið er með hefðbundinni aðferð (ekki leyfilegt að skauta). Fjórar vegalengdir verða í boði: 20 km (sem gefur stig í Íslandsgöngunni), 10 km, 5 km og 2 km sem er ætlað fyrir níu ára og yngri. Keppendur verða flestir ræstir kl. 13:00, þeir yngstu (9 ára og yngri) verða þó ræstir hálftíma fyrr, kl. 12:30. Þá er mælst til þess að þeir, sem vilja ganga 20 km en fara hægar yfir, hafa t.d. ekki áður lokið 20 km göngu á skemmri tíma en tveimur klukkustundum, hefji gönguna líka kl. 12:30.
Veitt verða verðlaun fyrir þrjú fyrstu sæti í hverjum flokki (þrír aldursflokkar karla og kvenna í 20 km, opnir flokkar karla og kvenna í 10 km og 5 km) og allir, sem ljúka göngunni fá þátttökupening. Verðlaunaafhending og kaffihlaðborð verður eftir gönguna í skíðaskála Breiðabliks.
Þátttökugjald er 2500 kr. fyrir 20 km gönguna, 1500 kr. fyrir 10 og 5 km en frítt fyrir 9 ára og yngri sem ganga 2 km. Athugið að ekki er posi á staðnum þannig að þið eruð vinsamlegast beðin að hafa með ykkur seðla!
Æskilegt er að fólk skrái sig í gönguna hér á vefnum og nú hefur verið sett upp kerfi til að taka við skráningum, sjá myndina efst í hægri dálki! Einnig verður þó hægt að skrá sig í Ullarskálanum fyrir keppni, frá kl. 10:30 til 12:30, athugið þó að þeir, sem eiga að hefja gönguna kl. 12:30 mega ekki draga skráninguna fram á síðustu mínútu.

Bláfjallagangan 2011

Bláfjallagangan 2011 fór fram í Bláfjöllum laugardaginn 19. febrúar, viku síðar en upphaflega hafði verið áætlað vegna erfiðra veðurskilyrða. Á keppnisdaginn var lokað í Bláfjöllum vegna hvassviðris en engu að síður tókst gangan vel. Lagður hafði verið 4,5 km hringur um Neðri-Sléttu, niiður að gamla bílastæðinu og “upp fyrir hólinn”, um slóðir þar sem þokkalegt skjól er að fá fyrir hvassri austanáttinni.

41 keppandi lauk göngunni og er heildarúrslit að finna hér. Að göngu lokinni fór fram verðlaunaafhending í Ármannsskálanum og þar var einnig boðið upp á veitingar.

Bláfjallagangan 2010

Vegna fádæma snjóleysis á suðvesturhorni landsins reyndist ógerlegt að halda Bláfjallagönguna í Bláfjöllum að þessu sinni. Stjórn félagsins gafst þó ekki upp fyrir náttúruöflunum og gangan var haldin á Siglufirði 20. mars 2010 en Unglingameistaramót Íslands, sem átti að vera í Bláfjöllum, var einnig flutt til Siglufjarðar. Gangan fór vel fram, 35 luku keppni og má sjá úrslitin hér. Er Siglfirðingum þökkuð gestrisnin.

Bláfjallagangan 2009

Bláfjallagangan fór fram 14. febrúar 2009 og tókst einstaklega vel þrátt fyrir að veðrið væri ekki alveg upp á það besta. Fjöldi þátttakenda fór fram úr björtustu vonum en 84 hófu keppni.

Bláfjallagangan 2008

Bláfjallagangan fór fram 23. febrúar 2008 og var það í fyrsta skipti sem Skíðagöngufélagið Ullur stóð fyrir göngunni. Gangan tókst vel, rúmlega 40 þátttakendur luku keppni.

Bláfjallagangan 2007

Til stóð að Bláfjallagangan færi fram í mars 2007 en nauðsynlegt reyndist að aflýsa henni vegna erfiðra skilyrða.