Vantar þig rásnúmer í Vasagöngunni?

Vegna veikinda hefur losnað rásnúmer í Vasagöngunni. Hafðu samband í síma 557 6740 eða 857 1103.

Meistaramót barna 11-12 ára

Mótinu hefur verið frestað til 10. og 11. mars!

Skíðadeild Breiðabliks mun halda meistaramót barna 11-12 ára helgina 3.-4. mars 2012. Keppt verður í bæði alpagreinum og göngu og það hefur orðið að ráði að göngukeppnin verði haldin í samvinnu við Skíðagöngufélagið Ull.
Keppt er með bæði hefðbundinni og frjálsri aðferð. Fyrirkomulag verður að öllum líkindum þannig:
Laugardaginn 3. mars verða gengnir 5 km með hefðbundinni aðferð. Ræst verður með hópstarti kl. 13:00, við skála Ullar, samhliða Bláfjallagöngunni.
Sunnudaginn 4. mars verður ræst kl. 13:00 og þá gengnir 2 til 3 km með frjálsri aðferð. Vegalengd verður ákveðin á laugardeginum með hliðsjón af  hvernig brautaraðstæður verða.
Mótsboð og dagskrá meistaramótsins má finna með krækjunum hér fyrir neðan.

Mótsboð – ganga        Dagskrá – ganga        Mótsboð – alpagreinar        Dagskrá – alpagreinar

Laugardagur 25. febrúar – Námskeið í skíðagöngu fyrir almenning

Nú er besti tími vetrarins til skíðagöngu framundan og nóg er af snjónum í Bláfjöllum.

Þriðja námskeiðið í skíðagöngu fyrir almenning verður á laugardaginn. Námskeiðið hefst kl. 12:30 og lýkur kl 14:00, þeir þátttakendur sem þurfa skíðabúnað (takmarkaður fjöldi getur leigt búnað hjá okkur) eru beðnir að koma kl. 12:00. Námskeiðið kostar kr. 1000 og skíðabúnaður fyrir námskeiðið kr. 500 og greiðist við upphaf námskeiðsins (enginn posi).

Skráning hér til hliðar.

Fylgist með skilaboðum hér á síðunni á laugardagsmorgun ef fresta verður námskeiðinu vegna veðurs.
Þóroddur F.

Bláfjallagangan 2012

Smellið á myndina til að sjá hana stærri!

Bláfjallagöngunni er frestað um  óákveðinn tíma!

Bláfjallagangan 2012 fer fram við skála Ullar í Bláfjöllum laugardaginn 3. mars næstkomandi. Gangan er liður í Íslandsgöngunni, almenningsmótaröð Skíðasambands Íslands. Fjórar vegalengdir verða í boði: 20 km (sem gefur stig í Íslandsgöngunni), 10 km, 5 km og 2 km sem er ætlað fyrir níu ára og yngri. Keppendur verða flestir ræstir kl. 13:00, þeir yngstu (9 ára og yngri) verða þó ræstir hálftíma fyrr, kl. 12:30. Þá er mælst til þess að þeir, sem vilja ganga 20 km en fara hægar yfir, hafa t.d. ekki áður lokið 20 km göngu á skemmri tíma en tveimur klukkustundum, hefji gönguna kl. 12:30.
Veitt verða verðlaun fyrir þrjú fyrstu sæti í hverjum flokki (þrír aldursflokkar karla og kvenna í 20 km, opnir flokkar karla og kvenna í 10 km og 5 km) og allir, sem ljúka göngunni fá þátttökupening. Verðlaunaafhending og kaffihlaðborð verður eftir gönguna í skíðaskála Ármanns.
Æskilegt er að fólk skrái sig í gönguna hér á vefnum og nú hefur verið sett upp kerfi til að taka við skráningum. Smellið á myndina efst í dálkinum hér til hægri, fyllið í reitina og smellið síðan á “Submit”. Einnig verður þó hægt að skrá sig í Ullarskálanum fyrir keppni, frá kl. 10:30 til 12:30, athugið þó að þeir, sem eiga að hefja gönguna kl. 12:30 mega ekki draga skráninguna fram á síðustu mínútu.
Hér fyrir ofan er kynningarmynd fyrir gönguna, smellið á myndina til að sjá hana stærri!

Námskeið sem vera átti í Bláfjöllum í dag frestast

Vegna verðurs er lokað í Bláfjöllum og námskeið Birgis Gunnarssonar frestast fram í vikuna.
Þóroddur F.

Æfing fyrir börn og unglinga kl. 13 á laugardag í Bláfjöllum

Börn og unglingar eru boðin velkomin á æfingu kl. 13 á laugardag.
Við verðum u.þ.b. 2 tíma og fínt að koma með eitthvað nesti, því við stoppum aðeins í skálanum á miðri æfingu.
Ég lofa miklu fjöri og alveg öruggt að þeim sem mæta mun ekki leiðast.
Þeir sem þetta lesa ættu endilega að hvetja börn nágranna og vina til að koma og prófa. Þau þurfa ekki að koma með neitt með sér annað en gott skap og smá áhuga sem ég vonast til að geta aukið til muna! Allar græjur á staðnum og bara að vera búin til útivistar.

Hlakka til að sjá ykkur
Eiríkur

Helgin 18. – 19. febrúar

Það lítur þokkalega út með veður um helgina og ekki vantar snjóinn í Bláfjöllum var þar áðan og er nokkuð harðfenni og mun verða frekar leiðinlegt göngufæri utan spors, ef ekki kemur nýsnjór ofan á hjarnið.

Hvet alla til að notfæra sér skíðafærið, Vasafarar þurfa að ná 3 klst. samfelldri göngu og þurfa bara að hafa nóg að drekka og borða. Skálinn verður væntanlega opinn 10-17 og hægt að leigja skíði. Ekki er skipulögð kennsla fyrir almenning en ekki ólíklegt að hægt verði að fá tilsögn, bara kanna það í skálanum eða hafa samband við undirritaðan ef fleiri en 5 eru í hóp.

Við verðum líka með mannskap á háannatíma í Smáralind ásamt öðrum skíðafélögum að fræða um þau en þar verður einhverskonar vetrarhátíð um helgina.
Þóroddur F.

Fjarðargangan 25. febrúar 2012

Skíðafélag Ólafsfjarðar endurvekur nú Fjarðargönguna en hún er hluti af Íslandsgöngunni. Gangan fer fram laugardaginn 25.febrúar og hefst kl. 13:00. Boðið er upp á þrjár vegalengdir 5km,
10km og 20 km. Eftir keppni er svo verðlaunaafhending og kaffiveitingar í skíðaskálanum í Tindaöxl.

Nánari upplýsingar, svo sem um keppnisgjald og skráningu, má sjá á myndinni hér til hliðar, smellið á hana til að sjá hana stærri!

Myndir?

Frá námskeiði í skíðagöngu fyrir almenning laugardaginn 21. janúar 2012. Ljósm. Árni Tryggvason

Í dálkinum hér til hægri má smella á myndakrækju sem sækir myndasafn félagsins en þar má finna margar ágætar myndir sem tengjast starfsemi félagsins á liðnum árum. Þarna hefur hins vegar lítið bæst við í vetur. Nýjasta mappan er frá hjólaskíðamóti sem Ullur stóð fyrir í september og eina myndin, sem vefnum hefur borist síðan þá, er myndin hér til hliðar, ágæt mynd sem Árni Tryggvason tók af þátttakendum í skíðagöngunámskeiði fyrir almenning laugardaginn 21. janúar síðastliðinn.
Hafa ekki fleiri tekið myndir sem ættu erindi á myndavefinn? Þeir, sem vilja leyfa okkur hinum að njóta þeirra líka, eru beðnir að hafa samband við vefstjóra (krækja neðst í hægri dálki) og annað hvort senda honum myndirnar eða fá leiðbeiningar um hvernig þeir geta sett myndirnar sjálfir á vefinn.

Íslandsgöngu frestað

Hermannsgöngunni á Akureyri, sem átti að fara fram laugardaginn 11. febrúar, hefur verið frestað vegna slæms veðurútlits. Ný dagsetning hefur ekki verið ákveðin en málið er í athugun. Fylgist með á vef Skíðafélags Akureyrar, einnig verður reynt að flytja nýjar fréttir hér um leið og þær berast.