Um Íslandsgönguna 2012

Nú er öllum mótum Íslandsgöngunnar 2012 lokið en henni lauk að vanda með glæsilegri Fossavatnsgöngu. Þótt brennandi áhugi skíagöngumanna á Íslandsgöngunni sé ekki alltaf augljós eru áreiðanlega ýmsir sem hefðu gaman af að velta fyrir sér úrslitunum. Ekkert hefur enn birst um þau á vefsíðu Íslandsgöngunnar, síðasta hreyfing þar er frá því í haust þegar mótaskráin var kynnt, og þess vegna hefur svolítil samantekt verið sett á þennan vef. Það skal tekið fram að sá, sem það gerir, hefur ekkert umboð til þess frá forsvarsmönnum Íslandsgöngunnar og engin ábyrgð er tekin á að öll stig séu rétt reiknuð. Leiðréttingar og ábendingar eru vel þegnar. En hér má sjá lokastöðuna:  Úrslit Íslandsgöngunnar 2012

Það er ýmislegt athyglisvert í þessum tölum. Sem dæmi má nefna að aðeins ein kona lauk þremur göngum sem er tilskilinn lágmarksfjöldi til að komast á verðlaunapall. Aðeins einn lauk fleiri en þremur göngum en sá lauk reyndar öllum fimm. Aðeins einn lauk þremur göngum án þess að komast á verðlaunapall. Þetta samrýmist ekki vel hugmyndum sumra um að almenningsgangan Íslandsgangan eigi að höfða til sem allra flestra og hvetja fólk til að taka þátt í keppni á gönguskíðum.

Það voru 76 sem fengu stig í enhverri göngu. Ef litið er á fjölda þeirra sem fengu stig í einstökum göngum sést að Strandagangan er óumdeilanlega Íslandsganga nr. 1, a.m.k. þennan veturinn. Það er athyglisvert að það eru lengstu göngurnar (Fossavatnsgangan – 50 km, Orkugangan – 35 km (átti að vera 60 km)) sem skila fæstum með stig. Það voru 21 sem fengu stig úr lengstu vegalengd Fossavatnsgöngunnar en ef 20 km gangan þar hefði verið látin gilda til stiga hefðu 55 komist á blað. Það má því velta því fyrir sér hvort hin stórglæsilega Fossavatnsganga, þar sem eitt helsta markmið með 50 km göngunni er að fá sem flesta og öflugasta erlenda kappa til landsins handa íslenskum göngumönnum að reyna sig við, kunni að vera vaxin upp úr hinum þrönga búningi Íslandsgöngunnar, almenningsgöngu sem á að hvetja sem allra flesta til að ganga á skíðum. Það skal þó skýrt tekið fram að hér er alls ekki verið að gagnrýna Fossavatnsgönguna, hún er stolt allra íslenskra skíðagöngumanna og allir vilja veg hennar sem mestan.

Hugsum málið, er Íslandsgangan eins og hún ætti að vera og ef ekki, hvernig ætti hún þá að vera?

Uppskeruhátíð í Bláfjöllum

Ullungar héldu uppskeruhátíð vetarins við Þóroddsstaði í Bláfjöllum sunnudaginn 6. maí og fögnuðu unnum afrekum. Hátíðarhöldin hófust með boðgöngu þar sem fjórar sveitir öttu kappi.

Íþróttaafrekum var ekki þar með lokið því þá tók við keppnin um Ullarásinn en þar skyldu keppendur ýta sér upp með stólalyftunni í Suðurgili og hlaut sá nafnbótina sem hæst komst. Leikar fóru svo að Óskar Jakobsson varð Ullarás eftir harða baráttu við Snorra Ingvarsson og Þórhall Ásmundsson.

Þá voru grillin þanin, Þóroddur og Óskar sýndu snilldartakta við eldamennskuna og aðrir viðstaddir létu ekki sitt eftir liggja við að gera veitingunum góð skil.

Hátíðinni lauk með góðri göngu, líklega um 16 km hring, um Bláfjallasvæðið undir leiðsögn Þórodds og Trausta Tómassonar. Lítið var orðið um troðin spor en það kom ekki að sök því færið var ákaflega gott, þéttur snjór þar sem sólskinið hafði mýkt efsta lagið. Það var því leikur einn að ganga ótroðnar slóðir, jafnvel á mjóstu skíðum.

Þessi harðsnúna sveit bar sigur úr býtum í boðgöngunni: Þórhildur Sigurðardóttir, Árni Tryggvason, Óskar Jakobsson og Þórhallur Ásmundsson

Ullarásinn: “Óskar er sá Ullunga sem er ýtinn svo enginn má við hann keppa”

Allir höfðu góða lyst á pylsunum í blíðunni í Bláfjöllum

Í gönguferð með Trausta og Þóroddi

Enn er nægur snjór í Bláfjöllum og það er ástæða til að hvetja alla til að nýta hann næstu vikurnar. Þetta er í rauninni besti tíminn til skíðagöngu um Bláfjöllin, ekki síst þegar veðrið leikur við fólk eins og það gerði þennan dýrðardag.

Fleiri myndir frá hátíðinni eru komnar í myndasafnið, smellið á myndina í hægri dálkinum.

Lokahátíð Ullunga í dag, 6. maí, kl.12:00

Lokahátíð Ullunga verður í Bláfjöllum í dag og þurfa allir að mæta fyrir kl 12:00 en þá verður ræst í leika dagsins en að þeim loknum verða grillaðar pylsur handa öllum.

Í fyrradag var lagt um 5 km spor sem áreiðalega hefur haldist nokkuð gott ef vélsleðamenn hafa ekki ekið meira um það en búið var að gera í gærmorgun. Nægur snjór er um alla heiði og auðvelt að fara 20-30 km hring utan spora.

Í morgun kl 08 var 4-5 °frost og því áreiðanlega mikið harðfenni en við vonumst til að sólin verði búin að mýkja það um hádegisbil.
Sjáumst á eftir
Þóroddur F.

Bláfjöll – spor

Það var lagt spor í Bláfjöllum í dag það ég best veit og mun það nýtast vel í góðviðrinu um helgina. Hætt er við nokkurri fínni ösku í snjónum, miðað við hvernig ástandið var 1. maí en hugsanlegt er að við ferð troðarans við sporlagninguna hafi óhreini snjórinn blandast hreinni snjó sem var undir.
Sjáumst í fjöllunum, ekki sýst í slúttinu á sunnudaginn.
Þóroddur F.

Vertíðarlok í Bláfjöllum

Sæl verið þið.
Við munum fagna vertíðarlokum í Bláfjöllum á sunnudaginn og hvetjum alla félagsmenn til að mæta. Ræst verður kl 12:00 í létta boðgöngu með blönduðum sveitum og einnig verður hugsanlega sprettganga. Að því loknu verða grillaðar pylsur með öllu tilheyrandi í boði Ulls.
Sjáumst á sunnudaginn.
Þóroddur F.

Myndir úr Fossavatnsgöngunni komnar á myndavefinn

Myndir úr Fossavatnsgöngunni 2012 eru nú komnar á myndavefinn en hann finnst eins og kunnugt er með því að smella á myndina sem merkt er “Myndavefur” í dálkinum hér til hægri. Myndirnar eru teknar við startið uppi á heiði og við markið. Engar meyndir eru frá verðlaunaafhendingunni og ef einhverjir eiga slíkar myndir væri ákaflega vel þegið að fá að birta þær. Þá eru góðar myndir úr göngunni að sjálfsögðu vel þegnar. Þeir, sem vilja koma myndum á framfæri, ættu að senda vefstjóra tölvupóst (krækja neðst í dálkinum hér til hægri).
Reynt var að setja einhvern texta við allar myndirnar. Látið endilega vita ef þið rekist á einhverjar villur þar og eins ef ykkur finnst eitthvað vanta. Og munið að það má skrifa athugasemdir við myndirnar, slíkt gerir myndasafnið enn skemmtilegra!

Ullungar í Fossavatnsgöngu

Startið í 20 km göngu. Ef myndin er stækkuð með því að smella á hana má hér greina Ullungana Gerði Steinþórsdóttur (nr. 42, lengst til hægri, með rauða húfu), Ragnhildi Jónsdóttur (74), Árna Sigurðsson (41), Ingvar Einarsson (75), Magnús Björnsson (í svartri úlpu sem hylur rásnr. 47), Guðrúnu Pálsdóttur (18) og Þórhildi S. Sigurðardóttur (5).

Fossavatnsgangan á Ísafirði fór fram laugardaginn 28. apríl. Um tíma leit út fyrir að gangan yrði illa fyrir barðinu á veðri eða öllu heldur veðurspám eins og sumar aðrar göngur í vetur en með þrautseigju þeirra sem að göngunni stóðu tókst að ljúka henni með glæsibrag. Það var hárrétt ákvörðun hjá skipuleggjendum að fresta göngunni um þrjár klukkustundir því þótt frestunin kunni að hafa gert erfiðara fyrir með kaffihlaðborð, verðlaunaafhendingu og frágang úrslita fór gangan sjálf fram við bestu aðstæður sem í boði voru þennan daginn og um tíma yljaði sólin þeim sem biðu eftir skíðagörpunum við gönguhúsið á Seljalandsdal.

Fyrstur í mark í 50 km göngunni kom Markus Jönsson frá Svíþjóð. Aðeins 53 sekúndum síðar kom fyrsta konan í mark, en sú er fyrrverandi heimsmeistari í skíðagöngu, Aino-Kaisa Saarinen frá Finnland. Fyrstur íslenskra keppenda varð Kristbjörn R. Sigurjónsson SFÍ en Stella Hjaltadóttir SFÍ varð fyrst íslenskra kvenna. Það er athyglisvert að Kristbjörn (Bobbi sjálfur, aðaldriffjöður Fossavatnsgöngunnar) keppir í flokki 50-65 ára og sá sem kom í mark annar af 73 keppendum í 20 km göngu, Kristján Rafn Guðmundsson SFÍ, keppir í flokki 66 ára og eldri. Þetta er sýnir svo ekki verður um villst að skíðagöngu geta menn stundað með góðum árangri áratugum saman og það er full ástæða til að hvetja afreksíþróttamenn í öðrum greinum til að snúa sér að skíðagöngu þegar árin færast yfir.

Ullungar áttu myndarlegan hóp í göngunni. Af þeim 215 sem luku göngunni voru líklega um 24 frá Ulli. Talan er ekki alveg nákvæm, ekki er víst að allir félagsmenn hafi skráð sig í nafni félagsins. Vitað er um einn erlendan gest félagsmanns sem er skráður fyrir Ull og einnig um félagsmann sem ekki gat verið þekktur fyrir annað en að skrá sig fyrir sitt upprunafélag í þessari göngu. En það er hvort tveggja hið besta mál og breytir ekki því að u.þ.b. níundi hver keppandi í þessari göngu, sem er óneitanlega með glæsilegustu íþróttaviðburðum sem fram fara á Íslandi, kom frá Ulli.

Nokkrir Ullungar komust á verðlaunapall. Skemmtilegast er að lesa úrslitin í 50 km göngu kvenna, 16-34 ára, en þar voru Ullarstúlkurnar Hrefna Katrín Guðmundsdóttir og Málfríður Guðmundsdóttir þær einu sem öttu kappi við finnska heimsmeistarann. Í 50 km göngu karla 35-49 ára varð Ullargesturinn Peder Holst í 3. sæti og í 50 km göngu karla 50-65 ára varð Þórhallur Ásmundsson í 3. sæti. Í 20 km göngu kvenna 66 ára og eldri hlaut Gerður Steinþórsdóttir gullverðlaunin.

Myndir frá göngunni eru væntanlegar í myndasafnið áður en langt líður.

Heildarúrslit í Fossavatnsgöngunni 2012 má lesa hér.

1. maí í Bláfjöllum

Starfsmenn skíðasvæðisins í Bláfjöllum eru í fríi þar til á miðvikudag og því verður ekki lagt spor þar í dag eða á morgun. Þrátt fyrir það er ekkert því til fyrirstöðu að fara á gönguskíði og í tilefni 1. maí að fara í skíðagöngu utan spora t.d. upp á heiði eð vestur í áttina að Selvogsgötu. Legg til að fólk sameinst um að leggja af stað kl 11:00 og síðan ræður hver og einn för.

Um næstu hegli stefnum við á síðasta mót vetrarins og uppskerugrill – nánar um það síðar.
Þóroddur F.

Óskilamunir í skálanum í Bláfjöllum

Nokkuð hefur safnast upp af hönskum, hvít prjónahúfa, skíðagleraugu og eitthvað fleira sem við viljum gjarnan koma til eigenda. Ég tók með heim mjög vandaða rauða úlpu sem mun hafa orðið eftir í skálanum fyrir um tveimur vikum, ég tel að úlpan sé í eigu ungrar stúlku og getur eigandinn hringt í mig í síma 861 9561.
Þóroddur F.

Fossavatnsgangan 28. apríl – hvatning að vestan

Svona eru aðstæður í brautinni (22/4). Nógur snjór, hreinn og fallegur!

Sælir skíðamenn,

Nú líður óðum að stærsta og flottasta skíðaviðburði ársins hjá okkur gönguskíðamönnum. Skráningar hafa gengið vel en enn er pláss til að taka á móti fólki. Veðurhorfur eru fínar eins og alltaf, góða skapið er alltaf ríkjandi hér á Ísafirði þennan dag ársins. Nú er því ekki eftir neinu að bíða, skráðu þig strax og vertu með!!!!

Með kveðju/Best regards/Med vennlig hilsen/Hiihtoterveisin
Kristbjörn R.Sigurjónsson