Laugardagur 25. febrúar – Námskeið í skíðagöngu fyrir almenning

Nú er besti tími vetrarins til skíðagöngu framundan og nóg er af snjónum í Bláfjöllum.

Þriðja námskeiðið í skíðagöngu fyrir almenning verður á laugardaginn. Námskeiðið hefst kl. 12:30 og lýkur kl 14:00, þeir þátttakendur sem þurfa skíðabúnað (takmarkaður fjöldi getur leigt búnað hjá okkur) eru beðnir að koma kl. 12:00. Námskeiðið kostar kr. 1000 og skíðabúnaður fyrir námskeiðið kr. 500 og greiðist við upphaf námskeiðsins (enginn posi).

Skráning hér til hliðar.

Fylgist með skilaboðum hér á síðunni á laugardagsmorgun ef fresta verður námskeiðinu vegna veðurs.
Þóroddur F.

Bláfjallagangan 2012

Smellið á myndina til að sjá hana stærri!

Bláfjallagangan 2012 fer fram við skála Ullar í Bláfjöllum laugardaginn 3. mars næstkomandi. Gangan er liður í Íslandsgöngunni, almenningsmótaröð Skíðasambands Íslands. Fjórar vegalengdir verða í boði: 20 km (sem gefur stig í Íslandsgöngunni), 10 km, 5 km og 2 km sem er ætlað fyrir níu ára og yngri. Keppendur verða flestir ræstir kl. 13:00, þeir yngstu (9 ára og yngri) verða þó ræstir hálftíma fyrr, kl. 12:30. Þá er mælst til þess að þeir, sem vilja ganga 20 km en fara hægar yfir, hafa t.d. ekki áður lokið 20 km göngu á skemmri tíma en tveimur klukkustundum, hefji gönguna líka kl. 12:30.
Veitt verða verðlaun fyrir þrjú fyrstu sæti í hverjum flokki (þrír aldursflokkar karla og kvenna í 20 km, opnir flokkar karla og kvenna í 10 km og 5 km) og allir, sem ljúka göngunni fá þátttökupening. Verðlaunaafhending og kaffihlaðborð verður eftir gönguna en ekki er enn ljóst hvar það verður.
Æskilegt er að fólk skrái sig í gönguna hér á vefnum og fljótlega verður sett upp kerfi til að taka við skráningum. Einnig verður þó hægt að skrá sig í Ullarskálanum fyrir keppni, frá kl. 10:30 til 12:30, athugið þó að þeir, sem eiga að hefja gönguna kl. 12:30 mega ekki draga skráninguna fram á síðustu mínútu.
Hér fyrir ofan er kynningarmynd fyrir gönguna, smellið á myndina til að sjá hana stærri!

Námskeið sem vera átti í Bláfjöllum í dag frestast

Vegna verðurs er lokað í Bláfjöllum og námskeið Birgis Gunnarssonar frestast fram í vikuna.
Þóroddur F.

Æfing fyrir börn og unglinga kl. 13 á laugardag í Bláfjöllum

Börn og unglingar eru boðin velkomin á æfingu kl. 13 á laugardag.
Við verðum u.þ.b. 2 tíma og fínt að koma með eitthvað nesti, því við stoppum aðeins í skálanum á miðri æfingu.
Ég lofa miklu fjöri og alveg öruggt að þeim sem mæta mun ekki leiðast.
Þeir sem þetta lesa ættu endilega að hvetja börn nágranna og vina til að koma og prófa. Þau þurfa ekki að koma með neitt með sér annað en gott skap og smá áhuga sem ég vonast til að geta aukið til muna! Allar græjur á staðnum og bara að vera búin til útivistar.

Hlakka til að sjá ykkur
Eiríkur

Helgin 18. – 19. febrúar

Það lítur þokkalega út með veður um helgina og ekki vantar snjóinn í Bláfjöllum var þar áðan og er nokkuð harðfenni og mun verða frekar leiðinlegt göngufæri utan spors, ef ekki kemur nýsnjór ofan á hjarnið.

Hvet alla til að notfæra sér skíðafærið, Vasafarar þurfa að ná 3 klst. samfelldri göngu og þurfa bara að hafa nóg að drekka og borða. Skálinn verður væntanlega opinn 10-17 og hægt að leigja skíði. Ekki er skipulögð kennsla fyrir almenning en ekki ólíklegt að hægt verði að fá tilsögn, bara kanna það í skálanum eða hafa samband við undirritaðan ef fleiri en 5 eru í hóp.

Við verðum líka með mannskap á háannatíma í Smáralind ásamt öðrum skíðafélögum að fræða um þau en þar verður einhverskonar vetrarhátíð um helgina.
Þóroddur F.

Fjarðargangan 25. febrúar 2012

Skíðafélag Ólafsfjarðar endurvekur nú Fjarðargönguna en hún er hluti af Íslandsgöngunni. Gangan fer fram laugardaginn 25.febrúar og hefst kl. 13:00. Boðið er upp á þrjár vegalengdir 5km,
10km og 20 km. Eftir keppni er svo verðlaunaafhending og kaffiveitingar í skíðaskálanum í Tindaöxl.

Nánari upplýsingar, svo sem um keppnisgjald og skráningu, má sjá á myndinni hér til hliðar, smellið á hana til að sjá hana stærri!

Myndir?

Frá námskeiði í skíðagöngu fyrir almenning laugardaginn 21. janúar 2012. Ljósm. Árni Tryggvason

Í dálkinum hér til hægri má smella á myndakrækju sem sækir myndasafn félagsins en þar má finna margar ágætar myndir sem tengjast starfsemi félagsins á liðnum árum. Þarna hefur hins vegar lítið bæst við í vetur. Nýjasta mappan er frá hjólaskíðamóti sem Ullur stóð fyrir í september og eina myndin, sem vefnum hefur borist síðan þá, er myndin hér til hliðar, ágæt mynd sem Árni Tryggvason tók af þátttakendum í skíðagöngunámskeiði fyrir almenning laugardaginn 21. janúar síðastliðinn.
Hafa ekki fleiri tekið myndir sem ættu erindi á myndavefinn? Þeir, sem vilja leyfa okkur hinum að njóta þeirra líka, eru beðnir að hafa samband við vefstjóra (krækja neðst í hægri dálki) og annað hvort senda honum myndirnar eða fá leiðbeiningar um hvernig þeir geta sett myndirnar sjálfir á vefinn.

Íslandsgöngu frestað

Hermannsgöngunni á Akureyri, sem átti að fara fram laugardaginn 11. febrúar, hefur verið frestað vegna slæms veðurútlits. Ný dagsetning hefur ekki verið ákveðin en málið er í athugun. Fylgist með á vef Skíðafélags Akureyrar, einnig verður reynt að flytja nýjar fréttir hér um leið og þær berast.

Afsláttar- og ráðgjafarkvöld hjá ZO-ON Iceland

Vefnum hefur borist póstur frá Örvari J. Arnarssyni, verslunarstjóra ZO-ON Iceland, sem framleiðir og selur útivistarfatnað, þar sem skíðafólki er boðið að koma í verslun ZO-ON Iceland í Kringlunni (gegnt Zara og Bónus) miðvikudagskvöldið 15. febrúar 2012 kl. 19 til 21 og fá faglega ráðgjöf um val á skíða- og útivistarfatnaði. Einnig er í boði 30% afsláttur á öllum nýjum vörum ZO-ON. Allir eru velkomnir og Örvar verður sjálfur á staðnum og mun taka á móti gestum með bros á vör.
Mynd af boðskorti er hér til hliðar og má sjá það í fullri stærð með því að smella á myndina.

Íslandsgangan: Hermannsgangan á Akureyri 11. febrúar

Vefnum hefur borist eftirfarandi tilkynning:

Hermannsgangan fer fram laugardaginn 11. febrúar í Hlíðarfjalli og hefst kl. 13:00.  Gangan er hluti af Íslandsgöngumótaröð sem fram fer vítt og breitt um landið og er tilgangurinn m.a. að  hvetja almenning til þátttöku í þessari hollu íþróttagrein.
Skráning hefst kl 10:30 í gönguhúsinu.  Verðlaunaafhending og veitingar verða strax að móti loknu.

Keppt verður í eftirfarandi flokkum:

• Hermannsgangan 24 km.  Karlar og konur 16-34 ára, 35-49 ára og 50 ára og eldri. Þátttökugjald  2.500 krónur.
• Hermannsgangan 8 km og 4 km.  Karla- og kvennaflokkur. Þátttökugjald 16 ára og eldri er 1.500 krónur. Þátttökugjöld 12 ára og yngri 1.000 krónur.

Allar frekari upplýsingar á www.skidi.is og í síma 878-1624 á mótsdag. Skráning á staðnum.
Með von um að sjá sem flesta í Hliðarfjalli  laugardaginn 11.febrúar,

Skíðafélag Akureyrar.